Փաստ ինֆո

Իրականում այստեղ ուղղակի աղմուկ է։ Նախագիծը վերաբերում է հատուկ հանցագործություններ կատարածներին։ «Փաստինֆո»-ի հետ զրույցում այս տեսակետը հայտնեց ԱԺ «Իմ քայլը» խմբակցության պատգամավոր, տնտեսական հարցերի հանձնաժողովի անդամ Ծովինար Վարդանյանը։

Խոսելով «Բանկային գաղտնիքի մասին» օրենքում փոփոխություններ և լրացումներ կատարելու մասին նախագծից՝ պատգամավորը նկատեց, որ նախագծում առկա է հանցագործությունների ցանկ, որոնց առկայության պարագայում հնարավոր է տրամադրել հանցագործությանն առնչվող այլ բանկային հաշիվների բանկային գաղտնիքը։

«Սա բացարձակ չի մեղմացնում ընթացակարգը, որովհետև բանկային գաղտնիքը տրամադրվելու է դատարանի որոշմամբ և նախագծում առկա հինգ պայմանների միաժամանակյա ապահովման դեպքում»,-նշեց Ծովինար Վարդանյանը։
Նա ընդգծեց, որ նախագծում նշված կանոններից են դատախազի կամ նրա տեղակալի միջնորդությունը, դատարանի հիմնավորված որոշումը՝ թե ինչու է անհրաժեշտ այդ բանկային գաղտնիքը բացահայտել. «Անհրաժեշտ է հիմնավորել, որ հենց այդ հաշվի բացահայտումն էական նշանակություն ունի կոնկրետ այդ հանցագործության բացահայտման համար»,-հավելեց պատգամավորը։

Վերջինիս կարծիքով նախագիծը միանշանակ ոչ մի ռիսկ չի պարունակում. «Վստահաբար կարող եմ ասել՝ ՀՀ կենտրոնական բանկը երբևէ թույլ չէր տա որևէ ոտնձգություն բանկային գաղտնիքի նկատմամբ, որովհետև դա ֆինանսական կայութնության հենասյուներից մեկն է»,-ընդգծեց Ծովինար Վարդանյանը՝ ավելացնելով, որ բանկային գաղտնիքին կամայական կամ հայեցողական վերաբերելու դեպքում ուղղակի կխաղանք ֆինանսական կայունության հետ։

Ինչ վերաբերում է տնտեսագետների շրջանակնում առաջացած մտահոգություններին, որ գումարների արտահոսք լինի, պատգամավորն արձագանքեց. «Մենք խոսում ենք հանցավո՞ր ճանապարհով ձեռք բերված գումարներից։ Այդ հարցը շատ կարևոր է։ Այդ պարագայում հեափոխությունից հետո, երբ օրինականության և իրավական պետության հաստատման ուղղությամբ քայլեր ձեռնարկվեին, քաղաքացիներն այդ ժամանակ կարող էին հանել իրենց գումարները»,-ասաց պատգամավորը։

Մանրամասները՝ տեսանյութում

Հեղինակ` Հասմիկ Կոշկարյան