Փաստ ինֆո

«Ջերմուկցիները ճնշում չեն գործադրում Կառավարության վրա։ Չգիտեմ, թե վարչապետն ում նկատի ուներ՝ ասելով. «Միայն այն պատճառով, որ Կառավարության վրա ճնշում են գործադրում՝ մենք չենք պատրաստվում Ամուլսարի հանքը փակել», մենք ընդամենը մեր կամքն ենք արտահայտում։ Ժողովրդավարական երկրում նորմալ է, երբ ժողովուրդը որոշում է ինչպես և որտեղ պետք է ապրի»,-այս մասին այսօր «Փաստինֆո»-ի հետ զրույցում ասաց Ջերմուկի բնակիչ Շիրակ Բունիաթյանը՝ անդրադառնալով ՀՀ վարչապետ Նիկոլ Փաշինյանի ԱՄՆ-ում արված հայտարարությանը։

Հիշեցնենք, որ ԱՄՆ-ում իր ասուլիսի ժամանակ Փաշինյանն ասել էր. «Ամուլսարի հարցում իմ ամենամեծ դժբախտությունն այն է, որ բոլորն արդեն ունեն իրենց տեսակետն անկախ ամեն ինչից։ Մի մասն ասում է՝ Ամուլսարը սար է, ինչ ուզում է լինի, թեկուզ աշխարհը քանդվի, մյուսն մասն էլ ասում է՝ աշխարհն էլ քանդվի Ամուլսարը պետք է շահագործվի»,-ապա ավելացրել էր, որ ոչ մի շահագրգռվածություն չկա հանքը շահագործելու կամ չշահագործելու հարցում։

«Եթե ի հայտ չգան հանքը չշահագործելու հիմքեր, միայն այն բանի պատճառով, որ Կառավարության վրա ճնշում են գործադրում՝ մենք չենք պատրաստվում այն փակել»,-ասել էր ՀՀ վարչապետը։

Շարունակելով խոսքը՝ Ջերմուկի բնակիչն ասաց, որ իրենք գործադուլ, դասադուլ, քայլերթ արեցին ցույց տալու համար, որ ի վիճակի են նման քայլերի գնալ։
Բունիաթյանն ընդգծեց, որ քանի դեռ Կառավարության կողմից կոնկրետ քայլեր, կոնկրետ գործողություններ չկան, իրենք առաջին քայլը չեն անելու։

«Մենք ցույց տվեցինք, որ կարող ենք այս խաղաղ անհնազանդություններն անել, բայց չենք անում, քանի դեռ Կառավարությունը կոնկրետ քայլերի չի գնացել։ Մեր նպատակն այն է, որ այս ձմեռ մարդիկ պոստորում կրկին չմնան, եթե անգամ այս տարի հնարավոր չէ վերջնական որոշում կայացնել, գոնե որոշումն այնպիսին պետք է լինի, որ «Լիդիան Արմենիայի» մուտքը գոնե բացառվի»,-նշեց Ջերմուկի բնակիչը։

Նա հղում կատարելով վարչապետի խոսքերին, թե «Լիդիան Արմենիան» ասել է, որ այս տարի շինարարական աշխատանքներ չեն ձեռնարկվի, սակայն ցանկություն է հայտնել մտնել Ամուլսարի տարածք, մոնիթորինգ անել, տեխնիկայի, գույքի վիճակը գնահատել, ասաց, որ ջերմուկցիները ցանկանում են, այդ գործողություններն այս տարի բացառվեն։

«Ուզում ենք մարդիկ գնան տուն, մյուս տարի նորից մենք մերը կասենք, իրենք էլ իրենցը»,-ասաց Բունիաթյանը։
Խոսելով հետագա քայլերի մասին, ջերմուկցին ասաց՝ այս պահին կոնկրետ քայլեր չկան և որոշումները մեկ անձի կողմից չեն կայացվում։

«Կոնկրետ անձեր չեն որոշում կայացնում, քննարկումներ են լինում և ամեն բան ինքնաբուխ է տեղի ունենում, այս պահին կոնկրետ քայլեր չկան, մենք այսօր համերգ ունենք Ամուլսարի փրկությանը նվիրված ։ Այսպիսի ակցիաներ են լինելու, այլ ակցիաներ նախատեսված չեն»,-տեղեկացրեց Բունիաթյանը։

Հեղինակ` Սոնա Գեւորգյան