Փաստ ինֆո

Անկախությունը մեզ չտրվեց սկուտեղի վրա, մենք տարել ենք պայքարի բոլոր փուլերը, մեզ հետ եղել են շատ մարդիկ, որոնք դարձել են «մատաղ»՝ գաղափարի, որի մասին չի խոսվում: «Փաստինֆո»-ի հետ զրույցում ասաց ազատամարտիկ, «Կոռնիձոր» ջոկատի հրամանատար  Արա Խուդավերդյանը:

«Բնական է, եթե ողջերիս մասին չի արծարծվում` զոհվածները պետք է անտեսված լինեն: Ամեն մի սերնդափոխություն բերեց ինքն իր սիմվոլիկ, չեղած տեղից, իշխանական լծակներով ներգրավվածներին հերոսներ կարգելուն, քանի որ Մանվել Գրիգորյանի կարգախոսը, եթե վերցնենք,  «չագուչն» էլ էր իրենց ձեռքը, մեխն էլ էր իրենց ձեռքը»,- նշեց Կոռնիձորի Արոն՝ հավելելով. «Դեպի անկախություն տանող ճանապարհին՝ պետության, պետականության հիմքերում կանգնած մարդիկ դիտարկվում էին  սվոյ և ոչ սվոյ կարգախոսի մեջ»:

Ազատամարտիկի խոսքով՝  սեպտեմբերի 21-ի համար նախատեսված պարգևատրումները պետք է լինեին շոշափելի և անդրադարձ ՝ անկախ պատկանելիությունից: Նրա խոսով՝ 1993 - 94թթ. որպես Երկրապահի հիմնադիր նախագահ, նա սեփական միջոցներով պատվոգրեր է շնորհել այն մարդկանց, ովքեր իրականացրել էին քրտնաջան աշխատանք՝ մամլիչների տակ ընկնելով և մամլիչների տակից դուրս գալով: Նրա խոսքով՝  բացի իրենից բոլորին շնորհել է պատվոգրեր:

«Դրանից հետո պարգևատրումների շարասյունն այնպիսի մի փուլ է մտել, որին արժանացել են անարժանիները, ինչի հետեւանքով պարգևատրում կամ շնորհակալագիր կամ պետական կոչումներ ստանալուց հիասթափություն  է առաջացել բուն «լծկան եզների» մոտ: Այսինքն՝ այն մարդկանց մոտ, ովքեր կյանք, եռանդ, արյուն, ավյուն չեն խնայել Հայաստան պետության անկախացման համար»,- նշեց Խուդավերյանը՝ շեշտելով, որ պետք է պետականորեն պարտադրել՝ թացից չորը տարանջատումը,  անցյալ սերնդի ինքնության գնահատումը, որի միջոցով նոր սերունդը կդաստիարակվի բարոյահոգեբանական, պետականամետ մտածելակերպով, ինչը պետական մտածողություն ունեցող կադրեր կկերտի:

«Անկախությունը հայ ազգաբնակչության համար անհասանելի երևույթ էր: Անգամ ասում էին՝ սրանք խելագարվել են` մտածում են անկախության մասին: Առ այսօր էլ կա այդ ստրկամիտ մոտեցումը, որ շատերը մեզ տեսնում են Ռուսաստանի կրնկի (կաբլուկ) տակ: Մեր ժողովուրդը պետք է ունենա իր ուրույն դեմքը, ուրույն ուրվագիծը միջազգային հարթակներում և աշխարհը պետք է խոնարհվի և ընդունի մեզ՝ որպես այդպիսին»,- նշեց ազատամարտիկը: Այն հարցին, թե արդյո՞ք, միջազգային հարթակ ասելով, նա նկատի ունի արևմուտքը, Կոռնիձորի Արոն պատասխանեց. «Ոչ միայն: Ես նկատի ունեմ՝ թեկուզ ՄԱԿ-ի բարձրագույն ամբիոնը, որը միջազգային հարթակ է  դիտարկվում:Աշխարհը պետք է քեզ ընդունի, քեզ հետ հաշվի նստի՝ որպես անկախացած պետություն»:

Անդրադառնալով Բաքվի առաջարկին, որի համաձայն՝ Ադրբեջանում գտնվող ՀՀ քաղաքացիները պետք է փոխանակվեն Արցախում դատապարտված ադրբեջանական դիվերսանտների հետ` Արա  Խուդավերդյանը նշեց, որ դիվերսանտ արտահայտությանը տարակուսանքով է մոտենում:

«Թողնենք՝ ի՞նչ եղավ, ո՞նց եղավ, ինչպե՞ս մեկնաբանվեց և ինչու՞ մեկնաբանվեց, բայց պետք է գտնվի գործնական իրականացման պրոցեսներ, որպեսզի անգամ խոշտանգված հային փոխանակեն մեր ձեռքի տակ եղած ադրբեջանցիների հետ և փրկեն ամեն մի հայկական կյանք: Սա պետք է արվի պետականորեն, որպեսզի պետականորեն կարողանան նաև վերահսկել հետագա զարգացումները»,- ասաց Արա Խուդավերյանը:

Հեղինակ` Իզաբել Սահակյան