Փաստ ինֆո

«Կարծում եմ՝ վարչապետն ավելի հակված է լսել նրանց, ովքեր գտնում են, որ հանքը հարկավոր է շահագործել»,-այս մասին «Փաստինֆո»-ի հետ զրույցում ասաց քաղաքական գործիչ Անդրիաս Ղուկասյանը։

Ղուկասյանը ճիշտ չի համարում վարչապետի մոտեցումը, թե Ամուլսարի հանքի շահագործումն արգելող իրավական հիմքեր չկան. «Բավականին լուրջ հետազոտություններ կան, ելույթներ կան շարժման ներկայացուցիչներ, փորձագետների կողմից, որոնք գտնում են՝ հիմքերը բավարար են հանքի շահագործումը կասեցնելու համար»։

Խոսելով վարչապետի մեկ այլ հայտարարության մասին, որ եթե մտահոգություն կա բնապահպանական խնդիրների առումով, ապա ինչու՞ են քաղաքացիները թույլ տալիս, որ Թեղուտի հանքը կամ Զանգեզուրի պղնձամոլիբդենային կոմբինատը շահագործվի, Ղուկասյանն ասաց. «Թեղուտում համայնքն աջակցում էր հանքի արտադրողներին, և երբ շարժումը հասավ Թեղուտ, տեղացիների հետ բախում եղավ, իսկ այստեղ Ջերմուկ համայնքի կուռ դիրքորոշումը կա, և մենք աջակից ենք Ջերմուկին»։

Նա նաև ընդգծեց, որ հայ ազգի համար կարևոր նշանակություն ունեցող սիմվոլներ կան, դրանցից են Արարատը, ծիրանը, խաղողը և նաև Ջերմուկը, ապա ավելացրեց՝ դրանք հուզական նշանակություն ունեն հայ ազգի համար։

«Դրանք մեր ինքնությանը վերաբերվող երևույթներ են և դրա համար հանրությունը մեծ աջակցություն է ցուցաբերում Ջերմուկի հարցում։ Սա է գլխավոր տարբերությունը մյուս օրինակների համեմատ»,-նշեց քաղաքական գործիչը՝ ընդգծելով, որ վարչապետը սխալվում է, որ հաշվի չի առնում իր թվարկած հանգամանքները։

Հեղինակ` Սոնա Գեւորգյան