Փաստ ինֆո

«Այսօր հարգանքի և մեծարանքի տուրք ենք մատուցում մեր ժողովրդի տաղանդին, նրա ստեղծարար հզորությանն ու սեփական ուժերին հավատալու նրա կարողությանը։ Նոր Հայաստանի ամենակարևոր առանձնահատկությունը սա է, որ մենք խնդիր ունենք անընդհատ կերտել նոր հերոսներ»,-այսօր Գյումրիում «Մեր ժամանակի հերոսը» մրցանակաբաշխության ժամանակ ասաց ՀՀ վարչապետ Նիկոլ Փաշինյանը։

Նա նշեց, որ միշտ եղել է հարցը, թե ով է հերոսը ՀՀ-ում, ով է այն կերպարը, որին պետք է ձգտեն նմանվել երիտասարդները. «Այս հարցը սովորաբար մի պատասխան չի ունենում, աներկբա է, որ առաջին և ամենամեծ հերոսները մեր այն զինվորներն են, ովքեր կանգնած են սահմանին»։
Փաշինյանը նշեց նաև, որ աներկբա է այն փաստը, որ բոլոր ժամանակների հերոսներ են ժողովրդի արվեստն ու մշակույթը ստեղծած մարդիկ, գիտնականները, բազմաթիվ քաղաքական և պետական գործիչներ։

«Նոր Հայաստանի կերպարն ամբողջացնելու համար հարկավոր է հերոսական այդ համայնապատկերին ևս մեկ կարևոր շտրիխ ավելացնել, դա աշխատող և արարող մարդու կերպարն է։ Դրանք այն մարդիկ են, ովքեր ունեն համարձակություն տնօրինել իրենց ճակատագիրը, ովքեր ունեն համարձակություն իրենց ձեռքը վերցնել իրենց և իրենց հայրենիքի ճակատագրի ղեկը...»,-շեշտեց վարչապետը։

Նա ընդգծեց, որ Հայաստանի բարեկեցությունը, տնտեսական զարգացածությունը, բանակի հզորությունը կախված է նաև մեկ մարդուց և այդ մեկ մարդը ՀՀ քաղաքացին է։

«Պետք չէ մոռանալ, որ բանակն ամուր է իր թիկունքով, տնտեսությամբ, բարեկեցիկ ժողովրդով և մեր խնդիրն է, որ ՀՀ-ն լինի բարեկեցիկ քաղաքացիների երկիր և ՀՀ-ն լինելու է բարեկեցիկ քաղաքացիների երկիր, որտեղ մարդիկ ունեն բավարար ինքնագնահատական, բավարար չափով հավատում են իրենք իրենց ուժերին և սեփական ձեռքերով կառուցում են իրենց միջավայրի և հայրենիքի բարեկեցիկ ներկան»,-նշեց Փաշինյանը։

Մանրամասները՝ տեսանյութում։

Աղբյուր` Փաստինֆո