Փաստ ինֆո

Գյումրեցիներն արդեն հանելուկ են հորինել՝ էն ինչն է, ինչը՝ քառակուսի և սև: Խնդրեմ,  չշփոթեք Կազիմիր Մալևիչի առեղծվածային «Սև քառակուսու» հետ:

Չգուշակեցի՞ք: Եթե թեկուզ արդեն ձեզ բախտ է վիճակվել տեսնել Անկախության տոնի պաստառները, որոնք արդեն զարդարում են Գյումրի՝ մշակութային և նկարիչ-դիզայներների պակաս չունեցող  քաղաքի փողոցները, ապա գուշակելու բան դեռ էլի ունեք: Օրինակ, ի՞նչ է գրված, ինչու՞ է ընտրված այդ տառատեսակը, որ բառերը տողադարձ են արվել, ընդ որում, սխալներով: Ո՞վ է տեսել, որ նման դեպքերում տողադարձ արվի, տողադարձի նշան դրվի: Ընդհանրապես ինչու՞ է ընտրվել կոնկրետ այդ դիզայները, որը եթե չեմ սխալվում, Ոսկե ծիրանի պաստառներն էր երկնել նաև:

Եվ գիտե”ք, որն է ամենահետաքրքիրը՝ ներկա իշխանությունները կոռուպցիոն ռիսկերի որոնման համատեքստում առաջին հերթին առանց մրցույթի, մեկ աղբյուրից գնումներն էին մատնանշում, բայց հիմա եկել են ու դեռ չի եղել որևէ թեմա, միջոցառում, ծրագիր, որ մրցույթով անցկացնեն:

 Եվ պատճառաբանություններ եմ բերում, եթե այդպես անեինք, ապա այսպես կլիներ, չէինք հասցնի, կամ էլ՝ ձեռքներիցս բաց կթողնեինք դիզայներական մտքի  ,,աս,, համարվող  էսինչին: Խնդրեմ՝ կոռուպցիայի ցայտուն օրինակ՝ առանց մրցույթի և արդեն երկրորդ անգամ: Եթե ոչ ավելի…Շա՞տ եք հավանել տվյալ դիզայներին, ձեր քպական համագումարների բրոշյուրները տվեք ձևավորի, ոչ թե՝ անկախության տոնի պաստառները, որ մարդիկ՝ ահել ու ջահել ջանան ու ճգնեն՝ հասկանալ՝ թե ինչ է գրված: Կառավարության աշխատակազմի ղեկավարի բացատրությունն էլ էր ցնցող՝ ասում է՝ դիզայնի տրամաբանությունը՝ քառակուսին պահելն է, սիմետրիան:

Ի դեպ, այս անգամ պետության բյուջետային միջոցներից  տոնի համար հատկացվել է 220 միլիոն դրամ:

Գլուխկոտրուկի հանգույն այս ձևավորմանը դեռ գյումրեցիները սարկազմիկ  ոճով կանդրադառնան, բայց մինչ այս՝ ֆեյսբուք սոցիալական ցանցում այն սուր քննադատության է արժանանում:

Ընդ որում, զավեշտական են հնչում այն թույլ հակադարձումները, թե՝ մոդեռնիզմի ոճով է, հիշեցնում է 90-ականները և այլն: Հստակ է մեկ բան՝ համազգային տոնի խորհրդանիշը պետք է ընկալելի և հասկանալի լինի բոլորի համար, մինչդեռ գյումրեցիները ճգնում էին կարդալ և դժվարանում էին: ՈՒ ընդհանրապես ինչու՞ է որպես դոմինանտ ընտրվել սև գույնը: Անկախության համապետական, համազգային տոնի ընկալման կարևոր խորհուրդը նրա  միավորող, համախմբող նշանակությունն է, որտեղ  դոմինանտը՝ եռագույնը՝ կարմիր, կապույտ, ծիրանին է, այլ ոչ՝ քառակուսին պահելը:  Այն էլ՝ սև:

Հեղինակ՝ Ա.Ե.

Աղբյուր` Փաստինֆո