Փաստ ինֆո

Մենք կանաչների կուսակցությունը չենք և չենք փորձելու Ամուլսարի շարժումից քաղաքական դիվիդենտներ շահել. Սամսոնյան Խմբակցության անդամների և վարչապետի խոսքերից հանգում են այն կարծիքի, որ արդեն այդ որոշումը կա։ Հարց է, թե այդ որոշումն ինչպես կառուցել ժողովրդին և ինչպես բացատրել ժողովրդին, որ ճանապարհները պետք է բացվեն։ Այս մասին լրագրողների հետ զրույցում ասաց «Լուսավոր Հայաստան» խմբակցության պատգամավոր Անի Սամսոնյանը` անդրադառնալով Ամուլսարի հանքը շահագործելու խնդրին ։

«Մենք խոսել ենք ջերմուկցիների հետ և ասել, որ դա հեշտ չի լինելու, որովհետև ջերմուկցիների մոտեցումն այս հարցին կարծր է և նրանք չեն զիջելու»,- «Փաստինֆո»-ի փոխանցմամբ՝ ասաց պատգամավորը։ Նա ընդգծեց , որ ջերմուկցիները պայքարում են իրենց կյանքի և առողջության համար և նրանց այս պահին իրավական որևէ փաստարկ կամ հակափաստարկ ընդհանրապես չի հետաքրքրում։ Անի Սամսոնյանը ևս մեկ անգամ ընդգծեց խմբակցության դիրքորոշումը Ամուլսարի հարցով.«Մենք միշտ ասել ենք, որ կանաչների կուսակցությունը չենք և երբևէ չենք փորձելու այս շարժումից քաղել քաղաքական դիվիդենտներ , բայց միևնույն ժամանակ նշել ենք, որ որպես ընդդիմադիր ուժ մեզ համար շատ կարևոր է` հաշվի առնվի քաղաքացիների կարծիքը»,- հավելեց Անի Սամսոնյանը։

Հեղինակ` Հասմիկ Կոշկարյան