Փաստ ինֆո

Առաջին օրվանից ասել եմ, որ չեմ ընդունում ինձ առաջադրված մեղադրանքը. դա անհիմն է։ Լրագրողների հետ զրույցի ժամանակ ասաց ՀՀ պաշտպանության նախկին նախարար, «Մարտի 1»-ի գործով մեղադրյալ Սեյրան Օհանյանը։

«Այն ուղղորդված է նաև հայտնի խոսակցության տեսագրության ժամանակ, որ ասում են՝ Սեյրանին ձերբակալի»,-ասաց Սեյրան Օհանյանը՝ ընդգծելով, որ գտնում է ՊՆ-ն 2008թ.-ի մարտի 1-2-ի իրադարձությունների ժամանակ որևէ ծանր բան չի արել. «Ես ոչ մի հրաման չեմ տվել, բայց նշված հրամանները կազմվել են, որպեսզի չեզոքացվեն այն երկու սպառնալիքները, որ առկա էին այդ ժամանակ։ Դա քաղաքական գործընթացներին խառնվելն էր, ինչպես նաև բոլոր զորամասերի նկատմամբ հսկողությունն ամրացնելը, որովհետև ԱԱԾ-ից տեղեկություններ կային, որ զենք հայթայթելու նպատակով զորամասերի վրա հարձակումներ կարող է լինեին»,-նշեց Սեյրան Օհանյանը։

Վերջինս ընդգծեց, որ ինքը երբևիցե ոչ մի բանից չի խուսափել և միշտ ինքնակամ է ներկայացել։ Իսկ հարցին Ռոբերտ Քոչարյանին համարում է քաղբանտարկյալ, թե ոչ, արձագանքեց. «Գտնում եմ, որ առանձնացված մոտեցում կա Ռ. Քոչարյանի նկատմամբ։ Այդպես չէի կարծի, եթե նման մոտեցում լիներ ՀՀ բոլոր երեք նախագահների նկատմամբ, բայց քանի որ այստեղ առանձնացված մոտեցում կա, ինչ-որ մի բան այն չէ»,-ասաց Ս. Օհանյանը՝ չբացառելով, որ ՀՀ երկրորդ նախագահի նկատմամբ կա հետապնդում։

Աղբյուր` Փաստինֆո