Փաստ ինֆո

Երեւանի ընդհանուր իրավասության դատարանի Շենգավիթի նստավայրում դատավոր Աննա Դանիեբեկյանի նախագահությամբ քիչ առաջ որոշվեց անփոփոխ թողնել ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը։ «Փաստինֆո»-ի հաղորդմամբ` այս մասին դատարանի դահլիճում հայտարարեց նախագահող դատավորը։

Հիշեցնենք, որ նախորդ դատական նիստին պաշտպանները միջնորդել էին Քոչարյանի նկատմամբ կիրառել անազատության հետ կապ չունեցող խափանման միջոց` ստորագրություն, կամ կիրառել այլընտրանքային խափանման միջոց գրավը։ Ավելի վաղ նրանք միջնորդել էին նաեւ անհապաղ վերացնել Քոչարյանի նկատմամբ ընտրված խափանման միջոցը, ինչը, սակայն սեպտեմբերի 17-ին մերժվել էր։

Ռոբերտ Քոչարյանը մեղադրվում է սահմանադրական կարգը տապալելու և առանձնապես խոշոր չափերով կաշառք ստանալու մեջ։ Գործով մեղադրյալի կարգավիճակում են նաեւ ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հիշեցնենք նաև, որ ՍԴ-ն մասամբ բավարարել էր Ռոբերտ Քոչարյանի դիմումը եւ Հայաստանի Հանրապետության քրեական դատավարության օրենսգրքի 35-րդ հոդվածը` Սահմանադրության ուժով հատուկ պաշտպանությամբ օժտված պաշտոնատար անձանց գործառութային անձեռնմխելիությունը՝ քրեական գործի վարույթը կամ քրեական հետապնդումը բացառող հանգամանքների թվում չնախատեսելու մասով, ճանաչել Սահմանադրության 27-րդ հոդվածի 1-ին մասի 4-րդ կետին, 61-րդ հոդվածի 1-ին մասին, 63-րդ հոդվածի 1-ին մասին և 75-րդ հոդվածին հակասող և անվավեր: Իսկ Հայաստանի Հանրապետության քրեական դատավարության օրենսգրքի 135-րդ հոդվածի 2-րդ մասը համապատասխանում է Սահմանադրությանը

Հեղինակ` Միլենա Խաչիկյան