Փաստ ինֆո

Ինձ համար մարդու կյանքը գերակա արժեք է։ Կարծում եմ՝ պետք է անել առավելագույնը, որ նման կարգի փոխանակումները հնարավորինս շատ լինեն և բանակցություններն էլ տևական ժամանակ չձգձգվեն, որի արդյունքում շատ դեպքերում ունենում ենք տխուր վախճան, ինչպես եղավ Մանվել Սարիբեկյանի դեպքում։ «Փաստինֆո»-ի հետ զրույցում նման կարծիք հայտնեց ԱԺ «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով Ադրբեջանում գտնվող երկու հայ գերիներին ԼՂՀ-ում դատապարտված երկու դիվերսանտներով փոխանակելու ադրբեջանական առաջարկին։

«Սա այնքան նուրբ հարց է, որ պետք է քննարկեն երկու կողմերի պաշտպանության գերատեսչությունները։ Գերիների փոխանակում միշտ եղել է։ Վստահ եմ՝ մեր ռազմական գերատեսչությունները քննարկումներ տանում են»,-ասաց ԱԺ պատգամավորը։

Վերջինիս կարծիքով՝ հարցն ընդգրկված կլինի Հայաստանի և Ադրբեջանի արտգործնախարարների սեպտեմբերի 23-ին կայանալիք հանդիպման օրակարգում

«Բնականաբար հարցերի փաթեթում քննարկվում է նաև գերիների, ռազմագերիների փոխանակությունը։ Կարծում եմ և հույս ունեմ, որ մեր արտգործնախարարն անպայման Մամեդյարովի առաջ կբարձրացնի ընդամենը երկու օր առաջ Ադրբեջանի պաշտպանության նախարար Հասանովի՝ «նվաճողի» շատ ռազմատենչ հայտարարությունը, այն է՝ իրենք պատրաստվում են պատերազմի»,-ընդգծեց Նաիրա Զոհրաբյանը։

Նրա համար զարմանալի է մասնավորապես այն, որ Մինսկի խմբի համանախագահող երկրները, որ պատգամավորի խոսքով խոշորացույցով նայում են Հայաստանից դուրս եկող ցանկացած պաշտոնյայի հայտարարություն, անտեսեցին Ադրբեջանի պաշտպանության նախարարի հնչեցրած հայտարարությունը. «Այն ուղղակի, իմ վստահ համոզմամբ, հերթական հարվածն է բանակցային գործընթացին և դա անտեսվեց։ Կարծում եմ Հասանովի, Մամեդյարովի կողմից նմանատիպ հայտարարություններն ուղղակի ստիպում են, որ բանակցային գործընթացը հետևողականորեն դոփի տեղում»,-նշեց պատգամավորը։

Թե ինչ ունենք այսօր բանակցային գործընթացում, կա պրոգրես, թե ռեգրես, պատգամավորի պնդմամբ այդ մասին տեղեկատվություն չունեն. «Այսօր, ինչպես նաև նախկին իշխանությունների ժամանակ, ըստ էության, բանակցային գործընթացի մասին քաղաքական ուժերս ունեինք շատ քիչ տեղեկություն։ Ես չգիտեմ՝ դա լավ է, թե վատ, բայց փաստ է»,-հավելեց Նաիրա Զոհրաբյանը։

Մանրամասները՝ տեսանյութում։

Հեղինակ՝ Հասմիկ Կոշկարյան

Աղբյուր` Փաստինֆո