Փաստ ինֆո

Երևանի ընդհանուր իրավասության դատարանի Շենգավիթի նստավայրում քիչ առաջ մեկնարկեց Մասիսի քաղաքապետ Դավիթ Համբարձումյանի, նրա եղբոր` Գոռ Համբարձումյանի, և ևս վեցի գործով դատական նիստը։ Այն նախագահում է դատավոր Ռոբերտ Պապոյանը։

Նշենք, որ դատական նիստին տուժողներից ոչ ոք ներկա չէ։ Նիստերի քարտուղարը հայտնեց, որ տուժողներից մեկը դիմում է ուղարկել դատարան` խնդրելով իրեն ծանուցել նիստի օրվա եւ տեղի մասին միայն այն դեպքում, երբ ինքը պիտի հարցաքննվի։ Մեկ այլ տուժող էլ դիմում է հղել` տեղեկացնելով, որ ինքն առհասարակ չի ցանկանում ներկայանալ դատական նիստերին։

«Փաստինֆո»-ի հաղորդմամբ այս պահին դատարանը հետազոտում է Էրեբունում դիմակավորված անձանց վրա հարձակման վերաբերյալ տեսագրությունները։ Նշենք, որ այս դրվագով Մասիսի քաղաքապետ Դավիթ Համբարձումյանին առաջադրված մեղադրանքը հանվել է. Դատախազությունից մեզ հայտնել էին, որ իր մասով գործը կարճվել է հանցակազմի բացակայության հիմքով։

Հիշեցնենք, որ նախորդ դատական նիստին մեղադրող կողմը հրապարակեց մեղադրական եզրակացությունների համառոտ բովանդակությունը, այնուհետև սահմանվեց ապացույցների հետազոտման հաջորդականությունը։ Որոշվեց սկզբնապես ուսումնասիրել գործում առկա տեսանյութերը, ապա՝ մեղադրանքի կողմի վկայակոչած փաստաթղթային ապացույցները, որից հետո հարցաքննել վկաներին, տուժողներին եւ նոր միայն ամբաստանյալներին։

Ավելի վաղ հայտնել ենք, որ ըստ դատական-տեղեկատվական համակարգի՝ Դավիթ Համբարձումյանին մեղադրանք է առաջադրվել այն բանի համար, որ նա 2018թ․ ապրիլի 22-ին Արարատի մարզի Հայանիստ-Հովտաշատ գյուղերի խաչմերուկի բանուկ հատվածում մի խումբ անձանց հետ դիտավորությամբ կոպիտ կերպով խախտել է հասարակական կարգը, որն արտահայտվել է հասարակության նկատմամբ բացահայտ
անհարգալից վերաբերմունք և զուգորդվել նույն օր՝ ժամը 19։00-ի սահմաններում, Հանրապետության հրապարակում կայանալիք հանրահավաքին մասնակցելու նպատակով դեպի նշված հրապարակ երթ կազմակերպած մասնակիցների նկատմամբ նախապես իրենց հետ վերցված զենքի և որպես զենք հանդիսացող առարկաների գործադրմամբ բռնություն գործադրելով և գույքը ոչնչացնելով։

Քաղաքապետի եղբորը՝ Գոռ Համբարձումյանին, մեղադրանք է առաջադրվել այն բանի համար, որ նա, 2018թ․ ապրիլի 16-ին հասարակական կարգը խախտելու դիտավորությամբ խմբի կազմում բացահայտ անհարգալից վերաբերմունք դրսևորելով , սեփական անձը վեր դասելով, հասարակության մեջ առանց պատճառի 5 րոպե տևողությամբ հայհոյանքներ է հնչեցրել Հերացի և կորյուն խաչմերուկները փակած ցուցարարների հասցեին, որի ընթացքում բռնություն գործադրելով՝ ձեռքերով և ոտքերով հարվածներ է հասցրել նրանց։

Գործով մյուս ամբաստանյալները մեղադրվում են քննությամբ դեռևս չպարզված մի խումբ անձանց հետ անհայտ անձի կողմից կազմակերպված զանգվածային անկարգություններին մասնակցելու, ցուցարարների հասցեին հայհոյանքներ հնչեցնելու եւ խուլիգանական մղումներով գույքային վնաս պատճառնելու մեջ։

Հեղինակ` Միլենա Խաչիկյան