Փաստ ինֆո

Այսպես` կոչված թավշյա  հեղափոխության  արդյունքում ակտիվացած կամ որ ավելի ճիշտ է՝ Տեր-Պետրոսյանի կամոք երրորդ կամ չորրորդ շնչառություն ստացած որոշ քաղաքական դեմքերի վարքաբանությանը ցույց է տալիս, որ  նրանք հիշողության կորստով են տառապում: Այդ որոշներից մեկը նորանկախ Հայաստանի պատմության թիվ 1 ընտրակեղծարար և այդպիսով ընտրական ինստիտուտը Հայաստանում արմատից, հիմքից աղտոտած, Գագիկ Ջհանգիրյանն է,  որն այսօր  սրբի դիմակ է հագել, թեպետ ճիշտ և ճիշտ այն գայլին կնմանի, որին գառ են պահ տվել: Դա կվկայեն մեր կողքին ապրող և հիշողության կորուստ չունեցող շատ-շատերը:

Բայց եկեք տեսեք, որ Վճռաբեկ դատարանը երեկ բավարարել է Գագիկ Ջհանգիրյանի վճռաբեկ բողոքը, որով նա պահանջել էր բեկանել տարիներ առաջ իր նկատմամբ կայացված մեղադրական դատավճիռը եւ արդարացնել։ Դատարանն արդարացրեց նրան, որ այս դեպքում՝ նույնն է, թե՝ սրբացրեց… Իր վրա վերցնելով ողջ պատասխանատվության բեռը Գագիկ Ջհանգիրյանի կատարած և կատարելիք անիրավությունների…

Այն, որ հենց Գագիկ Ջհանգիրյանն է հիմք դրել ընտրակեղծարարությանը Հայաստանում, կարծում եմ, երկու կարծիք լինել չի կարող: Հակառակ կարծիք կարող են ունենալ, թերևս միայն երիտիշխանավորները՝ այն պարզ պատճառով, որ Ջհանգիրյանի կյանքի այդ փուլում դեռ ծնված չեն եղել, նրա զինդատախազ աշխատած տարիներին՝ բանակ չեն զորակոչվել, կամ էլ՝ դեռ մանուկ են եղել:

Պատկերացնու՞մ եք երկիրն իր բնականոն հունից, օրինականության ռելսերից թեքած ու շեղած այս  հիմնադիր-ընտրակեղծարարը մանկուրտիզմով է տառապում և համարձակվում է այս ոլորտում իրենից ավելի մեղավորի մատնացույց անել՝ մոռանալով, որ  ոլորտի գուրուն է ինքը:

Ի դեպ, այն, ինչի համար նա վճռաբեկ բողոք էր ներկայացրել և արդարացվեց, թերևս, Գագիկ Ջհանգիրյանի բաց գործունեությունն է, մինչդեռ նա հայտնի է, որպես ստվերային կերպար: Մարդ, որի հետ փոխշփումից խուսափել են, որը տարիներ լինելով զինդատախազ, որպես իր մասին հիշողություն թողել է դաժանությունն  ու նենգությունը: Մարդ, որի դաժանության բնութագրիչ որպես հիշատակվում է անձնական բանտ ունենալը:

Զարմանքից քար կտրելու բան է,  թե ոնց կարելի է ունենալ դատարանով արդարացված Ջհանգիրյան, որը եկել ու  դատական  համակարգը վերակազմավորելու, վերաշինելու մասին է խոսում:  Ասում է՝ ոչ միայն դատական, այլև՝ ողջ իրավապահ համակարգը վերաշինման կարիք ունի՝ այսպիսով ուղղակիորեն առաջարկելով Փաշինյանին իր ծառայությունները իրավական ոլորտում: 

Մարդ, որն իշխանության ներկայացուցչի, այսինքն, իր գործը կատարող ոստիկանների  նկատմամբ բռնություն է կիրառել / ՀՀ քր օր. 316-րդ հոդվածի 1-ին մաս/՝ մեկին ձեռքով հարվածել, ֆիզիկական ցավ պատճառել, պատռել մեկ այլ աշխատակցի համազգեստը և եկել, այսօր խոսում է իրավապահ համակարգը կարգի գցելու՞ց:

Ըստ էության, Գագիկ Ջհանգիրյանը տարիներ շարունակ չի կարողացել մարսել ՀՀ առաջին նախագահի պատիժը: Բանն այն է, որ 1996-ին Տեր-Պետրոսյանը՝ նրան խոստացված արդարադատության նախարարի պաշտոնում մեկ ուրիշին նշանակեց, այդպիսով զսպելով  մեծ ամբիցիաներ և ախորժակ  ունեցող Ջհանգիրյանի ախորժակը: Հիմա երևի Լևոնը որոշել է Նիկոլի միջոցով քավել իր մեղքը, ի վերջո, կյանքի 64-րդ տարում  բաշխելով  Ջհանգիրյանին իր ուզածը, որն ըստ լուրերի՝ մեկ արդարադատության նախարարի, մեկ գլխավոր դատախազի, մեկ էլ՝ այս ոլորտի մոնստր կառույցի ղեկավարի պաշտոնն է

Բայց իրավապահ համակարգը վերաշինելու գործընթացի մասին, երբ Ջհանգիրյանն է խոսում, զգուշացեք, վախեցեք, քանի որ իրավապահ ոլորտում սեփական բանտ ունեցողը ողջ երկիրն է պատրաստ վերածել բանտի:

Ի դեպ, ազնվության  ու արդարության թեմայով բարոյախոսի դեր ստանձնած  Գ. Ջհանգիրյանը,  լրատվամիջոցների ներկայացմամբ Մոնումենտի կանաչ տարածքների հաշվին առաջին և  ամենամեծ առանձնատան տերերից է, որն, ըստ լուրերի՝ 20000 դոլարով վարձով է տալիս:

Հեղինակ` Արթուր Գահնապետյան