Փաստ ինֆո

Կառավարության շենքի դիմաց զոհված  զինծառայողների այրիների ու մայրերի բողոքի ակցիան շարունակվում է։

Քիչ առաջ սեւազգեստ մայրերին է մոտեցել վարչապետ Նիկոլ Փաշինյանը։

«Ես գիտեմ, թե   ինչի մասին եք խոսում։ Ես ձեր հարցին անուղղակի եմ պատասխանելու, երբ 2018թ դարձա վարչապետ, ՀՀ զինծառայողների պաշտպանության հիմնադրամը վճարում էր 2017 թ հունվարի մեկից հետո տեղի ունեցած դեպքերի համար, առաջին որոշումներից մեկը, որ կայացրիք, այդ հիմնադրամի գործունեության ժամկետը 3 տարով հետ տանելն էր ։ Սեպտեմբերի 21-ի առիթով Եռաբլուրում էինք եւ մեր կողմից հարգված սեւազգեստ մայրերը մոտեցան ինձ եւ ասացին՝ մենք վիրավորված ենք, դուք մեզ վիրավորել եք»,- ակցիայի մասնակիցների հետ զրույցն այսպես սկսեց վարչապետ Փաշինյանը։

Փաշինյանի խոսքով, 2011 թվականին զոհված զինծառայողների մայրերին այն ժամանակ բացատրվել է, որ կառավարության գործողություններից ոչ թե պետք է վիրավորվել, այլ քաջալերվել ։ «Դրանից 7 ամիս հետո որոշում կայացվեց, որ սկսել ենք վճարել 2008 թ հունվարի մեկից հետո տեղի ունեցած դեպքերը, մեկ տարվա մեջ մենք 9 տարով հետ ենք տարել։ Մեր խնդիրն է,  հասնել նրան, որ հիմնադրամը հետ գնա մինչեւ 90-ականեր, բայց դրա համար պետք է, որ աշխատատեղերը գրանցվեն։ Այս տարի արդեն 65 հազար գրանցված նոր աշխատատեղ ունենք»,-հայտարարեց Փաշինյանը՝ պահանջելով, որ հնարավորություն տրվի կառավարությանը հերթով լուծել խնդիրները։

«Որպես վարչապետ ես ամաչում եմ, ներողություն եմ խնդրում, որ ձեր հարցը լուծված չէ, բայց մեկ տարվա մեջ լուծել ենք 9 տարվա հարց»։ Փաշինյանը հայտարարեց, որ պաշտպանության նախարարին հանձնարարել է քայլեր ձեռնարկել՝ ընդլայնելու շահառուների  շրջանակը։ Այդ փաստաթուղթն արդեն շրջանառության մեջ է դրվել։

Զինծառայողների ապահովագրության հիմնադրամի խորհրդի անդամ, «Զինվոր համակարգող խորհուրդ»-ի նախագահ Մարգարիտա Խաչատրյանը նշեց, որ 4 անգամ դիմել են կառավարությանը, սակայն անպատասխան են մնացել։

Ապա` սևազգեստ մայրերը անդրադարձան Մարտի 1-ի զոհերի փոխհատուցման փաստին։  «Եթե Մարտի 1 դեպքերով տալիս եք 30 միլիոն կարող էիք այս ընտանիքներին էլ հանգստացնել, ոչ թե ասել փողոցի կռվի ժամանակ զոհվածներին ենք վճարում»,-հայտարարեց Մարգարիտա Խաչատրյանը։ Ի պատասխան, Փաշինյանն արձագանքեց. «Մեր իրավաբանները եկել են եզրակացության, որ Մարտի 1-ի գործերով  ՄԻԵԴ-ում  ՀՀ-ն պարտվելու է եւ ՄԻԵԴ-ն է պարտավորեցնելու, որ այդ գումարը կամ ավելի շատ գումար վճարվի։ Մենք ասում ենք՝ քանի որ քաղաքական փոփոխություն է  եղել, ճիշտ կլինի, որ ՀՀ կառավարությունն ինքն էլ ընդունի այդ խնդիրը։ Կարծում եմ, որ սա ճիշտ է»։

Աղբյուր` Փաստինֆո