Փաստ ինֆո

Երեկ վարչապետի աշխատակազմի ղեկավարը հանդես է եկել հայտարարությամբ, որտեղ ներկայացրել է պաշտոնանկությունների ամբողջ պատմությունը։ Այս մասին այսօր լրագրողների հետ զրույցում ասաց Բարձր տեխնոլոգիական արդյունաբերության նախարար Հակոբ Արշակյանը՝ անդրադառնալով Արթուր Վանեցյանին և Վալերիյ Օսիպյանին  նախկին պաշտոններից ազատելու վարչապետի որոշմանը։

«Կարծում եմ՝ նորմալ իրավիճակ է, երբ գործատուն իր աշխատակցի աշխատանքից գոհ չի լինում և որոշվում է, որ նա այդ պաշտոնում պետք է չաշխատի»,-ասաց նախարարը։

Հարցին, եթե վարչապետը գոհ չէր Վալերիյ Օսիպյանի աշխատանքից, ապա ինչու նշանակեց խորհրդական, Հակոբ Արշակյանն արձագանքեց. «Ընդհանրապես աշխատանքի տարբեր ուղղություններ և տարբեր պարտականություներ կան և այդ առումով չէի ցանկանա մեկնաբանել։ Դրանք տարբեր աշխատանքներ են, մի տեղում մարդը կարող է լավ է աշխատում, մյուս տեղում՝ ոչ»,-նշեց նախարարը։

Անդրադառնալով ԱԱԾ նախկին տնօրեն Արթուր Վանեցյանի հրաժարականից հետո գրված տեքստին, Հակոբ Արշակյանը նկատեց, որ մեկնաբանությունների համար պետք է դիմել Վանեցյանին. «Այդ հայտարարության անդրադարձ եղել է և չէի ցանկանա ևս մեկ անգամ մեկնաբանել։ Կարծում եմ՝ հայտարարությունն անողին պետք է իր հայտարարության մեկնաբանության մասին հարցնեք»,-հավելեց Հակոբ Արշակյանը։

Հեղինակ` Հասմիկ Կոշկարյան