Փաստ ինֆո

Չեմ գտնում, որ ստվերի դեմ պայքարի լավագույն ճանապարհը միայն ՀԴՄ-ով աշխատելն է։ «Փաստինֆո»-ի հետ զրույցում այս կարծիքն արտահայտեց Հայաստանի գործատուների միության նախագահ Գագիկ Մակարյանը՝ անդրադառնալով ՀԴՄ սարքերի արդյունավետությանը։

«ՓՄՁ-ների մեծ մասը գործում է փոքր շուկայում, նրանք արտահանող չեն։ Նրանց բիզնեսի հաջողությունը կապված է շուկան ընդլայնելով։ Այսինքն պետք է գեներացնել տուրիզմը, հայրենդարձությունը, բարձրացնել գնողունակությունը»,-ասաց Գագիկ Մակարյանը՝ հավելելով, որ եթե չեն լուծվել այս խնդիրները, չեն հաղթահարվել բիզնեսի խոչընդոտները, չի ապացուցվել բիզնեսի եկամտաբերությունը, ապա բիզնեսն էլ ստիպված որոշակի ստվեր է պահում. «Բիզնեսը, որպեսզի չկոտրվի, ապահովի եկամտաբերություն, մնա բիզնեսի մեջ, ստվեր է պահում։ Մենք էլ ամեն ինչ անում ենք՝ վերջին կոպեկն էլ վերցնենք»,-նշեց տնտեսագետը։

Գագիկ Մակարյանի խոսքով իրենց վերջին՝ 2-3 ամիս առաջ կատարած վերլուծությունը ցույց է տվել, որ հարցված ՓՄՁ-ների և միկրոբիզնեսի 49 տոկոսի եկամտաբերությունը բավականացնում է միայն հագուստ և սնունդ գնելու համար. «Ինքը չի կարողանում գնել սառնարան, հեռուստացույց, որոնք ընդամենը 400-500 դոլարի ապրանքներ են։ Այսինքն 49 տոկոսն աղքատ բիզնես է։ Եթե ՀԴՄ-ով ուզում են ֆիքսել այդ 49 տոկոսը դարձնեն 60 տոկոս, ի՞նչ են շահում դրանից։ Վաղը հնարավոր է փակվեն հազարավոր ֆիրմաներ և գործազրկություն մոդեռնացվի»,-նկատեց Գագիկ Մակարյանը։ Վերջինիս կարծիքով ՀԴՄ-ի արագությունը պետք է ժամանակի հետ գա։ Մասսայական դա կիրառել, երբ դեռ լուծված չեն մնացյալ խնդիրները, տնտեսագետի կարծիքով ողջունելի քայլ չէ։

Աղբյուր` Փաստինֆո