Փաստ ինֆո

Այն, որ շատ մարմիններ են ավելանում, որոնք կարող են կարգապահական վարույթ հարուցել դատավորի նկատմամբ, չեմ կարծում, որ ձեզ պետք է մտահոգի, քանի որ կա Բարձրագույն դատական խորհուրդ, որի հիմնական գործառույթը դա դատական համակարգի դատավորի անկախության ապահովումն է։ Այս մասին Երևանի ընդհանուր իրավասության դատարանի դատավորների հետ հանդիպման ժամանակ հայտարարեց ԲԴԽ անդամ Գրիգոր Բեքմեզյանը։

«ԲԴԽ-ն այն վերջնական մարմինն է, որը պետք է ապահովի, որ այդ մարմինների կողմից կայացված վարույթներն օբյեկտիվորեն քննվեն և դատավորը վստահ լինի, որ առանց որևէ իրավական հիմքի իր նկատմամբ կարգապահական վարույթ չի հարուցվել»,-նշեց Բեքմեզյանը։

Վերջինս ընդգծեց, որ համաձայն է նվազեցնել այն մարմինների քանակը, որոնք պետք է կարգապահական վարույթ հարուցեն, սակայն այս փուլում ԲԴԽ անդամի կարծիքով դա հնարավոր չէ, քանի որ պետք է կարողանան վստահություն ձևավորել դատավորների ընդհանուր ժողովին կից կարգապահական հանձնաժողովի նկատմամբ. «Վստահություն կձևավորվի այն ժամանակ, երբ այդ հանձնաժողովը գործի այնքան բաց ու թափանցիկ, որ հանրության մոտ հանձնաժողովի սուբյեկտիվության վերաբերյալ կասկած չի առաջանա»,-նշեց ԲԴԽ անդամը՝ հավելելով, որ այդ ժամանակ միայն կխոսեն մյուս մարմիններին այս գործընթացից հանելու մասին։

Աղբյուր` Փաստինֆո