Փաստ ինֆո

Այսօր ֆեյսբուքյան ուղիղ եթերից ԱԺ «Լուսավոր Հայաստան» խմբակցության ղեկավար, համանուն կուսակցության նախագահ Էդմոն Մարուքյանը մեղադրել է ՀՀԿ-ականներին իրենց ներկայացրած նախագծի շուրջ «վայնասուն բարձրացնելու» մեջ։

«Մի վայնասուն են են բարձրացրել, մի ձենները գցել են, թե վայ, ժողովրդավարությունը վտանգված է, հիմա ում ուզի՝ կարող է նշանակել ոստիկանապետ , իսկ կներեք, հիմա ում ուզել ուզի, չի՞ նշանակել։ Ուզում եք ձեր թիմից նշանակի, որ ձեզ չբռնե՞ն, ինչ է նշանակում՝ իր թիմից պետք է նշանակի»,-ուղիղ եթերից հայտարարել է Էդմոն Մարուքյանը։

Հիշեցնենք, խորհրդարանն առաջին ընթերցմամբ ընդունել է «Լուսավոր Հայաստան»-ի ներկայացրած «Ազգային անվտանգության մարմիններում ծառայության մասին», «ՀՀ օրենքում փոփոխություններ կատարելու մասին», «Ոստիկանությունում ծառայության մասին», «ՀՀ օրենքում փոփոխություններ կատարելու մասին», «Հանրային ծառայության մասին» ՀՀ օրենքում լրացում կատարելու մասին» օրենքի նախագիծը, որով առաջարկվում է Ազգային անվտանգության ծառայության տնօրենի և Ոստիկանության պետի պաշտոնները հանել ոստիկանության պաշտոնների և ազգային անվտանգության մարմինների ծառայողների պաշտոնների անվանացանկերից և դրանք համարել քաղաքական պաշտոններ՝ այդ աշխատատեղերում նշանակվող անձանց համար ևս սահմանելով պատգամավորի թեկնածուին ներկայացվող պահանջները:

Մարուքյանն անդրադարձել է տարիքային շեմի խնդրին. «Ասում են ո՞նց կարելի է 25 տարեկանին նշանակել, կներեք, գործող իրավակարգավորումներով , պաշտպանության նախարար կարելի է նշանակել 25 տարում նշանակված անձը, բա այդ ժամանակ ո՞նց է վայնասուն չեք բարձրացրել, որ պատերազմ վարելու փորձ չի ունենա, ակնհայտ դու ձեզ բացահայտում եք, որ սարսափելի անհանգիստ եք այդ մարմիններում նոր ռեֆորմների հետ կապված։ Ինչո՞ւ , որովհետեւ երեւի մինչեւ հիմա այդ մարմինների կողմի հովանավորվել եք»։

Մարուքյանը հայտարարել է, թե այն համակարգը , որը ժառանգել ենք, հիվանդ է։ Ըստ նրա, այսօր իշխանություններին ամենաշատը քննադատում են ՀՀԿ-ականները, որ իրենց չեն բռնում։ «Միայն այն հանգամանքը, որ նախորդ ռեժիմը դեմ է այս ռեֆորմին , խոսում է այն մասին, որ սա օդի պես անհրաժեշտ է»,-հայտարարել է Մարուքյանը՝ հավելելով, որ իշխանության «խելքը ժամանակին չհասավ» կառավարության կառուցվածքն իրենց առաջարկածին համաձայն ձեւավորել։

Մարուքյանը նաեւ հայտարարել է, որ այսօր առաջնային մանդատով օժտված ԱԺ պատգամավորի կարգավիճակից ավելի բարձր կարգավիճակ Հայաստանում գոյություն չունի, իսկ ԱԺ պատգամավոր կարող է ընտրվել 25 տարին լրացած, վերջին 4 տարին ՀՀ-ում ապրող ՀՀ ռեզիդենտ քաղաքացին։

«Այս չափանիշին են պատկանում նաեւ նախարարները, այդ թվում՝ կիսապատերազմական երկրի պաշտպանության նախարարը ։ Մենք շարունակում ենք մնալ այն մտքին, որ այո, այդ մարմինները պետք է դառնան նախարարություններ եւ այս լուծումը միջանկյալ լուծում է»։
Նա մեղադրանքներ է հնչեցրել նաեւ քաղաքագետների ու փորձագետների հասցեին, ովքեր քննադատել են այդ նախագիծը։
Մարուքյանը հիշեցրել է, որ «Լուսավոր Հայաստան»-ը ներկայացրել էր կառավարության կառուցվածք, ըստ որի ԱԱԾ-ն եւ ոստիկանությունը պետք է նախարարություններ դառնային, բայց կառավարությունը մերժել էր այդ նախագիծը, որին հաջորդել էին հիշյալ փոփոխությունները։ Ըստ Մարուքյանի, կառավարության կոմիտեի նիստին լուրջ բանավեճ է եղել ԱԱԾ ղեկավարի տեղակալի եւ Ոստիկանապետի տեղակալի հետ։ Կառավարության բացասական եզրակացությամբ նախագիծը մտել է խորհրդարան։ ԱԺ պետաիրավական հանձնաժողովում հարցը դրական եզրակացություն է ստացել՝ պայմանով, որ պետք է աշխատել, առաջարկներ ներկայացնել։

«Այն դժգոհությունները, որ կային այդ ժամանակահատվածում, որ կոռուպցիայի դեմ պայքարը լավ չի ընթանում եւ այլն, գալիս էին նրանից, որ, ըստ էության գործադրի ղեկավարը կաշկանդված է այդ մարմինների ղեկավարներ նշանակել այդ մարմինների ռեզերվից եւ չունի ազատություն նշանակելու այն մարդկանց, որոնք կաշկանդվածություն չունենան։ Պարզ է չէ, էդ մարդիկ կերել-խմել են նախորդ իշխանությունների հետ եւ հիմա այդ մարդկանց բռնելու հետ կապված բարդույթներ ունեն, ակնհայտ բան է»,- հայտարարել է Մարուքյանը։

Աղբյուր` Փաստինֆո