Փաստ ինֆո

«Աշխարհում ընդունված է, որ երբ հատուկ ծառայությունների ղեկավարը հրաժարական է տալիս, հրապարակվում է չեզոք տեքստ, իսկ այս դեպքում տեքստը ոչ այնքան հրաժարականի, որքան դուռը շրխկացնել էր։ Իսկ դա կատարվում է միայն մեկ դեպքում ՝ երբ փակվում է մի ժամանակահատված եւ բացվում է մեկ այլ ժամանակահատված »,-«Փաստինֆո»-ի հետ զրույցում ասաց քաղտեխնոլոգ Արմեն Բադալյանը՝ անդրադառնալով ուժային կառույցներում հրաժարականներին, եւ, մասնավորապես, ԱԱԾ արդեն նախկին տնօրեն Արթուր Վանեցյանի հրաժարականին։

Այս հեռացումը, ըստ քաղտեխնոլոգի , էականորեն կարող է փոխել Հայաստանի ներքաղաքական դաշտը։ Հետհեղափոխական մեկ ու կես տարվա ընթացքում Հայաստանի քաղաքական դաշտը 2 բեւեռի էր բաժանված՝ սեւ եւ սպիտակ կամ հեղափոխական՝ ձեւավորված վարչապետի շուրջ եւ այսպես ասած, հակահեղափոխական՝ ձեւավորված 2-րդ նախագահ Ռոբերտ Քոչարյանի շուրջ։

«Խնդիրը նրանում է, որ 2-րդ նախագահի շուրջ ձեւավորված բեւեռը չի կարող ընկալվել որպես այլընտրանքային զարգացող բեւեռ, իսկ ահա Վանեցյանի պարագայում, եթե նա մտնի քաղաքականություն, ինչը նա ոչ հերքեց, ոչ հաստատեց, կարող է օբյեկտիվորեն դառնալ վարչապետին այլընտրանք, բայց դեպի առաջ նայող այլընտրանք»,-կարծում է քաղտեխնոլոգը։

Արմեն Բադալյանը սրանով է բացատրում վարչապետի մամլո խոսնակի շատ կոշտ պատասխանը Վանեցյանի հայտարարության տեքստին։ Ըստ նրա, սրանով առաջին անգամ փորձ կատարվեց Վանեցյանին կապել նախկին համակարգի հետ, նաեւ փորձ կատարվեց Վանեցյանին ներկայացնել որպես խամաճիկ. «Ինչո՞ւ, որովհետեւ նրանք հասկանում են, որ Վանեցյանը, քաղաքականություն մտնելու դեպքում ունի համապատասխան ռեսուրսներ»։

Անդրադառնալով ռեսուրսներին՝ քաղտեխնոլոգը շեշտեց, որ թե վարչապետը, թե Վանեցյանը ժողովրդի որոշակի հատվածի աջակցությունն ունեն. «Այս պահի դրությամբ գուցե Փաշինյանը Վանեցյանից ավելի մեծ հեղինակություն ունի, բայց միտումն այն է, որ մեկի վարկանիշն իջնում է, մյուսինը, եթե չբարձրանա էլ, ստատիկ վիճակում կանգնած է»։

Մյուս ռեսուրսը , ըստ քաղտեխնոլոգի վարչականն է, որը ունի Փաշինյանը, բայց Վանեցյանն էլ իր հերթին պետական համակարգի հետ հարաբերություններ ունի։ Վանեցյանը նաեւ ի պաշտոնե տեղեկացված է եւ, ըստ Բադալյանի, ամենակարեւոր ռեսուրսը՝ աշխարհաքաղաքական կենտրոնների աջակցությունն է, որը այս պահին Վանեցյանն ունի, Փաշինյանը՝ ոչ։

«Տեսանելի որեւէ աջակցություն վարչապետը չունի։ Ռուսաստանի հետ հարաբերությունները , մեղմ ասած, խնդրահարույց են, ԵՄ-ն ուղղակի հաշվի չի առնում Փաշինյանին , ԱՄՆ-ի դեպքում էլ Թրամփի աշխատակազմը որեւէ տեսանելի աջակցություն չի ցուցաբերում ՀՀ իշխանություններին, մինչդեռ ԱԱԾ նախկին տնօրեն Վանեցյանը ունի ռուսական կողմի աջակցությունը, որովհետեւ առանց այդ աջակցության նա չէր կարող այդ ժամանակահատվածում զբաղեցնել այդ պաշտոնը եւ ռուսների հետ ունենալ աշխատանքային հարաբերություններ»։

Ըստ քաղտեխնոլոգի, էական է ճիշտ եւ ժամանակին օգտագործել ունեցած ռեսուրսները։ «Ենթադրում եմ, որ այդ ռեսուրսները արագ պետք է կապիտալիզացվեն։ Չի բացառվում , որ դա կարող է տեղի ունենալ մինչեւ Արցախի նախագահական ընտրությունները»,-կարծում է Արմեն Բադալյանը։

Քաղտեխնոլոգ Արմեն Բադալյանն ուշադրություն է հրավիրում այն փաստի վրա, որ վարչապետ Փաշինյանը մամլո ասուլիսի ընթացքում հայտնեց, որ քննարկել են ԱԱԾ տնօրեն Արթուր Վանեցյանի ՝հրաժարականի հարցը, որից րոպեներ անց ԱԱԾ տնօրենը իր հրաժարականի դիմումը ներկայացրեց։ «Մենք կարող ենք գալ հետեւյալ եզրակացության, երբ վարչապետը խոսում է ԱԱԾ տնօրենի հրաժարականի մասին, բնականաբար, քննարկում է տեղի ունենում նաեւ դիմումի բովանդակության վերաբերյալ, բայց, երբ վարչապետը ծանոթ չէ դիմումի բովանդակությանը, նշանակում է, որ նա չէր սպասում, որ դիմումը պետք է ներկայացվի հենց այդ պահին»,-նշում է քաղտեխնոլոգը։

Արմեն Բադալյանը շեշտում է՝ քաղտեխնոլոգիայի տեսանկյունից Վանեցյանին գրագետ գործեց, նրան հաջողվեց այսպես ասած, «ջրել» Փաշինյանի ասուլիսը եւ իր հրաժարականի տեքստը դարձնել թոփ թեմա։ «Լրատվական դաշտում այդ օրը խոսում էին միայն Վանեցյանի դիմումի բովանդակության մասին։ Մյուս կարեւոր փաստը, երբ ԱԱԾ տնօրենը հրաժարական է տալիս եւ մեկ օրից ավելի է՝ նրա փոխարեն նոր նշանակում չի արվում, նշանակում է վարչապետի հայտարարությունը, թե ինքը դրան պատրաստ էր, նույնպես իրականությանը չի համապատասխանում»։

Իսկ հայտարարության բովանդակությանը մեկ բան է նշանակում՝ գնահատական Փաշինյանի աշխատանքին։

Աղբյուր` Փաստինֆո