Փաստ ինֆո

«Ես դրանք համարում եմ բնականոն գործընթացներ եւ միայն այդ տիրույթում կարող եմ ասել, իսկ թե ինչն է հիմք հանդիսացել, որ մի պաշտոնը մեկ այլ պաշտոնով փոխարինվի, չեմ կարող ասել: Ամեն դեպքում, պաշտոնները հավերժ չեն եւ հասկանալի է, որ դրանք կարող են փոխարինվել», -լրագրողների հետ ճեպազրույցում հայտարարել է ՀՀ ԱԺ «Իմ քայլը» խմբակցության ղեկավար Լիլիթ Մակունցը՝ անդրադառնալով արդեն նախկին ոստիկանապետ Վալերիյ Օսիպյանի պաշտոնանկությանը, ապա վարչապետի գլխավոր խորհրդական նշանակվելուն։

Անդրադառնալով ԱԱԾ նախկին պետ Արթուր Վանեցյանի հրաժարականի հայտարարության տեքստին, որտեղ վերջինս մի շարք մտահոգություններ էր հայտնել, այդ թվում՝ որոշումների կայացման տարերայնության, առաջնայինը երկրորդականից չտարբերելու վերաբերյալ, Մակունցն, ըստ էության չի մեկնաբանել, ասել է, թե Վանեցյանը հրաժարականի հաջորդ օրը եւս մեկնաբանություն է արել եւ ինքն ավելացնելու ոչինչ չունի։

Նա ասել է, որ ԱԱԾ պետի պաշտոնանկության հետ կապված ինչ հնարավոր էր մեկնաբանել, ներկայացրել է Վարչապետը։ Ինչ վերաբերում է հնարավոր նոր պաշտոնանկություններին ՀՀ ԱԺ «Իմ քայլը» խմբակցության ղեկավարը ասել է, որ որեւէ տեղեկատվություն չունի։ Հարցին, թե իրականությանը համապատասխանո՞ւմ են Վիլեն Գաբրիելյանին ոստիկանապետ նշանակելու մասին լուրերը, Մակունցը պատասխանել է. «Այդ տեղեկության մասին իրազեկվել եմ մամուլից»:

Հիշեցնենք, նախագահ Արմեն Սարգսյանն այսօր հրամանագիր է ստորագրել Վալերի Օսիպյանին ոստիկանության պետի պաշտոնից ազատելու մասին, ինչից հետո նա նշանակվեց վարչապետի խորհրդական

Ավելի վաղ «Փաստինֆո»-ն տեղեկացրել էր, որ ՀՀ վարչապետ Նիկոլ Փաշինյանը ՀՀ ոստիկանապետ Վալերիյ Օսիպյանին աշխատանքից ազատելու առաջարկ է ներկայացրել ՀՀ նախագահ Արմեն Սարգսյանին: ՀՀ ոստիկանապետի պարտականությունների կատարումը դրվել է Ոստիկանության պետի առաջին տեղակալ Արման Սարգսյանի ուսերին։

Աղբյուր` Փաստինֆո