Փաստ ինֆո

Բարի և մարդասեր, ամերիկյան կինոների փրկիչ-ոստիկանի կերպարը, որ կերտվեց այլևս նախկին ոստիկանապետ Վալերի Օսիպյանից, կարծես հեղափոխության «դուխով»  առաջնորդը  այս փուլի հարմար ժամանակավրեպ է համարում:

Միգուցե պատճառն այն է, որ  թավշյա, Ժողովրդահաճո առաջնորդից ինքը՝  Փաշինյա՞նն էլ սկսում է գերադասել կոշտ միջոցները: Եվ բնականաբար, այդ պարագայում ինքը չի կարող իր կողքին հանդուրժել բարձրաստիճան ոստիկանի՝ ժողովրդական կերպարով Օսիպյանին: Մանավանդ, հիմա, այսօր, երբ նրա կոկորդին կանգնած է Ամուլսարի հարցը: Այն Ամուլսարի, որը զօր ու գիշեր պահպանում է ժողովուրդը: Այն Ամուլսարի, որն, ըստ ամենայնի,  ջրբաժան է դառնալու ժողովրդի և Փաշինյանի միջև: Ամուլսար տանող ճանապարհների ապաշրջափակման մասին  արդեն լսել ենք վարչապետից: Պատասխանը՝   «ոչ»-ն է եղել:

Բնականաբար, հաջորդիվ հետևելու են ուժային միջոցները: Այդ ուժային միջոցներին սպասող «ժողովրդավար» Արևմուտքը հիմա այլ խնդիր է դնում Փաշինյանի առաջ՝ պոպուլիստ, ժողովրդահաճո ղեկավարի փոխարեն հիմա էլ կոշտ գործողությունների ունակ պաշտոնյայի կերպարով հանդես գալու խնդիր: Պատճառները թերևս, այլ կերպ կձևակերպվեն՝ ասենք՝ պիտի Ամուլսարը բացեք, այլապես ներդրումներ չեն գա Հայաստան, այլապես լուրջ չեն ընդունում ձեզ. և այլն, և այլն:

Այն, որ թավշյան դառնում է կոշտուկոպիտ,  երկաթյա բռնապետություն՝ դեռ ավելի վաղ էր Փաշինյանը ցուցադրել, վեթինգը և դատարանների շրջափակումը՝ վկա:  ՀՀՇ-ական  շրջանակների հոխորտանքը՝ վկա…

Այսինքն, հիմա բոբոյի  դեր է անհրաժեշտ խաղալ, իսկ այդ դերի համար համատարած բոբոներ են անհրաժեշտ, քանզի չի կարող այնպես լինել, որ բարի, ժողովրդական ոստիկանապետ ունենանք, անվտանգային թեմաների վերաբերյալ զգուշացնող և այդ հարցերը կարևորող ԱԱԾ ղեկավար, այսինքն՝ դրական կերպարներ,  բայց՝ դեսպոտ-վարչապետ: Հակառակը, վարչապետը պիտի լինի ամենաամենան, բարի ցարը, իսկ մյուսները՝ հակառակը…

Այս համատեքստում արժե հիշել նաև, որ ավելի վաղ Դավիթ Սանասարյանին էլ Փաշինյանը մեկուսացրեց, ընդ որում, հենց այն ժամանակ, երբ  նա  ակտիվ գործունեություն էր ծավալում և դրական իմիջ ուներ: Վերջինս, ի դեպ, դժգոհելով, որ շարունակում է մնալ մեկուսացված և չի կարողանում մասնակցել պետականաշինությանը, այսօր հրապարակային դիմել է Փաշինյանին, Ամուլսարի հետ կապված իր հին ընկեր Նիկոլին և վարչապետին կոչ անելով և խնդրելով՝թույլ չտալ, որ հայրենիքի ևս մի կարևոր տարածք դառնա կորսված և վտանգավոր. «Նախորդներն առանց այն էլ իրենց հանցավոր պայմանավորվածություններով Հայաստանը դարձրել են հանքաստան, իսկ հեղափոխությունը ենթադրում է հեղափոխություն նաև այս ասպարեզում։ Ուստի չպետք է մի կազմակերպության կատարած փորձաքննության վրա թույլ տալ, որ հայրենիքի ևս մի կարևոր տարածք դառնա կորսված ու վտանգավոր։ Չվախենալով շահագրգիռ մյուս կողմից հնչող միջազգային ատյաններ տանելու հաթաթաներից՝ անհրաժեշտ է ստոպ տալ այս վտանգավոր գործընթացը, կայացնել պետականամետ որոշում, ընդառաջ գնալ սեփական ժողովրդին ու դուրս գալ նախորդների լարած թակարդից»։

Արդյո՞ք Փաշինյանը կլսի հին ընկերոջ ձայնը:

Չէ՞ որ պատահական չէ, որ Փաշինյանը մեկ-մեկ սկսել է ձերբազատվել ուժայիններից, ընդ որում, մարդկանցից, որոնք իր կառավարության մեջ հարգանք վայելողներն են: Նկատենք, որ ՀՀ պաշտպանության նախարար Դավիթ Տոնոյանն արդեն իսկ  հերքել է իր հնարավոր հրաժարականի կամ պաշտոնանկության մասին լուրերը, թեպետ պնդումներ կան, որ  Փաշինյանը նրան չի շրջանցի, հերթը նրան էլ կհասնի:

Օդում կախված լուրերի համաձայն, Վալերի Օսիպյանը հրաժարական է տվել, քանի որ չի համաձայնել Ամուլսարը շրջափակող ժողովրդի դեմ ուժով գնալ: Իսկ սա նշանակում է՝ հաջորդիվ կունենանք ոստիկանապետ, որը չի խորշի այդ քայլից: Այսինքն, «Ոստիկանը մե՜րն ա, ոստիկանը մե՜րն ա» վանկարկումին ի պատասխան, Փաշինյանն այսօր ասում է՝ «Էլ ձե՜րը չի, իմն ա…» Հավելենք,  որ Օսիպյանի հրաժարականից հետո  Գերագույն Խորհրդի պատգամավոր, քաղաքական գործիչ Ալբերտ Բաղդասարյանն իր ՖԲ էջում գրեց, թե նրա փոխարեն նշանակվելու է Անդրանիկ Քոչարյանը։ Հավելելով, թե՝ «Սկզբից ժողովուրդն է երնեկ տալու Օսիպյանին, հետո՝ Նիկոլը»:

Հեղինակ` Մարինե Մինասյան