Փաստ ինֆո

Այս դատաիրավական համակարգը վաղուց վերակազմավորման կարիք ունի։ «Փաստինֆո»-ի հետ զրույցում նման կարծիք հայտնեց ՀՀ նախկին զինվորական դատախազ, գլխավոր դատախազի նախկին տեղակալ Գագիկ Ջհանգիրյանը՝ Վճռաբեկ դատարանի կողմից արդարացվելուց հետո։

«Վերաքանդելու, վերաշինելու կարիք ունի։ Ոչ միայն դատական համակարգը։ Ամբողջ իրավապահ համակարգը։ Այս իրավապահ և դատական համակարգը ծառայել է մի իշխող կլանի շահերին։ Անմեղ մարդկանց հարյուրներով լցրել են բանտերը։ Ես առաջին արդարացվածն եմ, բայց հո ես վերջին դատապարտվածը չեմ»,- նշեց Գագիկ Ջհանգիրյանը՝ հավելելով, որ 110-112 հոգի 83 քրեական գործով մեղավոր են ճանաչվել և դատապարտվել ազատազրկման՝ շինծու, անհիմն մեղադրանքներով։

«250-260 անձ մինչդատական վարույթում կալանավորվել է այդ մեղադրանքներով։ Հետո՝ մեկը հիվանդության, մեկը հետ է կանգնել իր հայացքներից ազատ են արձակվել։ Այսինքն՝ դատվել են վերջնական 83 գործով 110 մարդ և այդ դեպքերից անցել է 11 տարի և ես առաջին արդարացվածն եմ այդ գործերով»,- ասաց Ջհանգիրյանը։

Ըստ նրա՝ իզուր կորցրել են 1 տարի 3-4ամիս։ «Գլխավոր դատախազությունն այսօր հայտարարություն է տարածել, թե ինքը բողոքարկումը սկսել է, ծանոթանում է եւ այլն... Ինքն այդ որոշմանը հանգել է այն բանից հետո, երբ Վճռաբեկ դատարանն իմ բողոքը վարույթ է ընդունել»,- ասաց նախկին զինվորական դատախազը։

Հիշեցնենք, որ Վճռաբեկ դատարանն այսօր բավարարել է Գագիկ Ջհանգիրյանի վճռաբեկ բողոքը, որով նա պահանջել էր բեկանել տարիներ առաջ իր նկատմամբ կայացված մեղադրական դատավճիռը եւ արդարացնել։

Ավելի վաղ տեղեկացրել ենք, որ 2019թ հուլիսի 16-ին Գ. Ջհանգիրյանը վճռաբեկ բողոք է ներկայացրել շուրջ 10 տարի առաջ կայացված դատական ակտի դեմ, որով ինքը մեղավոր էր ճանաչվել ոստիկանի նկատմամբ բռնություն գործադրելու համար՝ ՀՀ քրեական օրենսգրքի 316-րդ հոդվածի 1-ին մասով։ Այն է՝ Իշխանության ներկայացուցչի կամ նրա մերձավոր ազգականի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ՝պատժվում է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով կամ կալանքով՝ առավելագույնը մեկ ամիս ժամկետով, կամ ազատազրկմամբ՝ առավելագույնը հինգ տարի ժամկետով: Գագիկ Ջհանգիրյանը դատապարտվել էր 3 տարի ազատազրկման։ Գագիկ Ջհանգիրյանը վերոնշյալ դատավճիռը բողոքարկել էր Վերաքննիչ դատարան, սակայն 2009թ. մայիսին դատարանն անփոփոխ էր թողել այն։ Հիշեցնենք, որ  ըստ դատավճռի՝ Ջհանգիրյանը 2008թ.-ին ՀՀ Ոստիկանության ԿՀԴՊ Գլխավոր վարչության վարչական շենք մտնելու պահին չենթարկվելով ոստիկանության աշխատակիցներին, ձեռքով հարվածել էր վարչության աշխատակցին՝ պատճառելով ֆիզիկական ցավ, նաև պատռել մեկ այլ աշխատակցի համազգեստը:

Աղբյուր` Փաստինֆո