Փաստ ինֆո

«Բնականաբար մենք իշխանության ներքին որևէ բանի չենք տիրապետում, բայց այսպես կոչված մեր քաղաքական ինտուիցիան մեզ հուշում է, որ պարոն Վանեցյանի կողմից արված հայտարարությունը հեռուն գնացող է»,- ԱԺ-ում ճեպազրույցների ժամանակ հայտարարեց «Լուսավոր Հայաստան» խմբակցության ղեկավար Էդմոն Մարուքյանը՝ անդրադառնալով ԱԱԾ տնօրենի պաշտոնից Արթուր Վանեցյանի հրաժարականին։

Ըստ նրա՝ այդ հայտարարությամբ Արթուր Վանեցյանը սկիզբ է դնում իր քաղաքական գործունեությանը և փորձելու է իր գործը շարունակել քաղաքականության մեջ։

Էդմոնդ Մարուքյանը նաեւ նշեց, որ Վանեցյանի հրաժարականն իրենց համար անակնկալ է եղել։ «Մենք շատ նորմալ, ջերմ հարաբերություններ ենք ունեցել պարոն Վանեցյանի հետ։ Մեզ համար նրա հրաժարականը անակնկալ է եղել»,- ասաց խմբակցության ղեկավարը՝ անդրադառնալով Վանեցյանի գործունեության գնահատականի վերաբերյալ հարցին։

Լրագրողի այն դիտարկմանը, թե իշխանության հետ պայմանավորվա՞ծ պետք է Վանեցյանը քաղաքական գործունեությամբ զբաղվի, Մարուքյանը պատասխանեց. «Ոչ, տեքստից ես չեմ տեսնում պայմանավորվածություն։ Ես նաև Փաշինյանի տեսակը գիտեմ, նա երբեք չի պայմանավորվում»։

Ինչ վերաբերում է «Իմ քայլ»-ի՝ ՍԴ նախագահի պաշտոնից Հրայր Թովմասյանի լիազորությունները դադարեցնելու գործընթացին, Մարուքյանն ասաց, որ նշված նախաձեռնությանը միանալու հարցով իրենց ոչ ոք չի դիմել։ «Չկա հիմքի այն թուղթը, որով նախաձեռնվում է, երբ որ կլինի՝ կմեկնաբանենք։ Ոչ մի կերպ կաշկանդված չենք, հիմա այստեղ ես ու Մանե Թանդիլյանը դեմ ենք քվեարկել Հրայր Թովմասյանին՝ ՍԴ նախագահ ընտրվելու ժամանակ՝ որպես «Ելք» դաշինքի պատգամավորներ, մեզ համար բարդություն չի ներկայացնում ևս մեկ անգամ դա անել քվեարկությամբ, բայց ֆունդամենտալ հարց կա՝ որքանով է գործընթացը սահմանադրական, ժողովրդավարական։ Թող հիմքերը ներկայացնեն՝ տեսնենք»,- ասաց նա։

Աղբյուր` Փաստինֆո