Փաստ ինֆո

Դա ակնհայտորեն փորձ է կամ հայտարարություն` Սահանադրության մի քանի հոդվածների խախտելու մասին: «Փաստինֆո»ի հետ զրույցում ասել է ՀՀ մարդու իրավունքների նախկին պաշտպան, «Ընդդեմ իրավական կամայականության» հկ գործադիր տնօրեն Լարիսա Ալավերդյանը՝ անդրադառնալով ՍԴ որոշման վերաբերյալ ԱԺ-ում Արարատ Միրզոյանի հայտարարությանը:

«Արարատ Միրզոյանի այս հայտարարությունն առնվազն ցույց է տալիս, որ ԱԺ խոսնակը պատրաստ է ոտնահարել կամ խախտել ՀՀ Սահմանադրության մի քանի հոդվածներ: Ընդ որում այդ հոդվածները տարբեր տեղերում են: Դա վերաբերում է և՛ առաջին գլխի հոդվածներին, որը վերաբերում է ընդհանուր առմամբ ՀՀ դատաիրավական համակագին, և՛ մարդու իրավունքներին: Դա ակնհայտորեն փորձ է կամ հայտարարություն է Սահանադրության մի քանի հոդվածների խախտման, արհամարհման, անտեսման մասին:»,- նշեց Լ. Ալավերդյանը:

Նրա դիտարկմամբ՝ դա նորություն չէ, այլ շարունակությունն է այն գործընթացների, առնվազն այն գաղտնալսման մեջ հնչեցված հրամանների՝ դատավորների կամ դատարանների վերաբերյալ:

«Սա այն ճանապարհն է, որը մեզ ուղղակի տանում է դեպի կամայականություն և միանձնյա կառավարում,ինչը վերին աստիճանի վտանգ է: Խոսքը գնում է ոչ թե այս կամ այն իշխանության վտանգի, այլ երկրի անվտանգության խնդիրներն են այստեղ արծարծվում»,- շեշտեց Լարիսա Ալավերդյանը:
Մեր այն հարցին, թե արդյո՞ք դատավոր Աննա Դանիբեկյանը նման ճնշման պայմաններում կկարողանա անաչառ որոշում կայացնել, Լարիսա Ալավերդյանն ասաց, որ ինքը նույնպես եղել է նման իրավիճակում և կարողացել է:

«Ես եղել եմ մոտավորապես նման իրավիճակում և կարողացել եմ կայացնել իրավունքից բխող որոշումներ, խնդիրների լուծում և այլն: Պատկերացնում եք, չէ՞, մենք խոսում ենք այն ժամանակների մասին, երբ նախագահում էր այսօրվա մեղադրյալ Ռոբերտ Քոչարյանը »,- ասաց իրավապաշտպանը:
Նրա խոսքով՝ այսօր Աննա Դանիբեկյանի անձնական խնդրից բացի, խնդիր է ՝ արդյո՞ք նա իրապես կապացուցի, որ երկրում կա դատական համակարգ, որը չի ենթարկվում կամայական որոշումների, որոնք որ իջեցվում են վերևից, գրեթե հրամայական տեսք են ընդունում:

«Այս առումով այդ բոլոր հայտարարությունները խոսում են պետական մտածելակերպի բացակայության մասին՝ լինի դա Արարատ Միրզոյանը, լինի դա մի քանի նախադասություններով գործող Վարչապետի արտահայտած մտքերը»,- նշեց Լարիսա Ալավերդյանը՝ հորդորելով գործել միջազգային իրավունքի նորմերի համաձայն:

«Ամեն անգամ, երբ որ ոտնահարվում է այս կամ այն օրենսդրության կամ օրենքի նորմը, ասում են, որ սա եղել է հին իշխանությունների մեղքով:Գոնե կան միջազգային իրավունքի այնպիսի սկզբունքներ, որոնք որ պարտադիր են իշխանությունների համար»,- ասաց իրավապաշտպանը:
Անդրադառնալով՝ Վարչապետի ասուլիսի ժամանակ հնչած հայտարարությանը, որի համաձայն Միքայել Մինասյանը կներգրավվի քրեական գործով, Լարիսա Ալավերդյանը նշեց, որ դա, փաստորեն, նույնպես հրաման է:

«Մենք իմանում ենք իրավական կամ գալիք՝ դեռ չսկսվածը:Մեզ տրված չէ դա իմանալ: Այսինքն՝ մենք պետք է լսենք այն, ինչ ասվում է ՝ նախքան գործընթացը սկսելը, նախքան մեղադրանքն ապացուցելը: Ամբողջ մեղքերի ցուցակը հրապարակեց գործող վարչապետը: Արդյո՞ք դա է իրավական պետությունը, և արդյո՞ք դա բնութագրում է իրավական պետության ղեկավարի կեցվածքը կամ խոսքը»,- ասաց Ալավերդյանը:

Նա նաև հայտնեց իր ափսոսանքը. «Ես այնքան ափսոսում եմ, որ մենք՝ թողած ճանապարհը, որը տանում է դեպի տաճար, դեպի իրավական պետության կառուցումը, իսկ այդպիսի հնարավորություն, ի վերջո թեկուզ վստահությունը, որը ստացել է Վարչապետը, կար: Այդ նախադրյալները կային: Թեկուզ և չունեի մեծ հույսեր, որովհետև գիտեի, որ ո՛չ իր թիմը, ո՛չ ինքը չունեին այն փորձառությունը, այն գիտելիքները, այն ունակությունները, որը պահանջվում է այնպիսի երկրին, ինչպիսին Հայաստանն է՝ կառավարման համար, բայց կարող էին օգտագործել փորձագետների, գիտնականների այն հարուստ շտեմարանը, որը Հայաստանում կա: Ցավոք սրտի՝ դա չարվեց: Ամեն ինչը գնում է իրենց քաղաքական գործիչ համարող, պատեհ առիթով պատգամավոր դարձած կամ կառավարության այս կամ այն պաշտոնը գրաված անձի համար: Դա ոչ այնքան քաղաքական գործընթաց է, որքան անձնավորված և խմբակային շահի դրսևորում: Ես կցանկանայի, որ մեր իշխանություններն այս 1,5 տարին օգտագործեին ունակություններ ձեռք բերելու համար, սթափվելու, լուրջ վերաբերվելու համար: Առայժմ դա տեղի չի ունեցել»,- ասաց Լ.Ալավերդյանը:

Հեղինակ` Իզաբել Սահակյան