Փաստ ինֆո

Երեւանի ընդհանուր իրավասության դատարանի Շենգավիթի նստավայրում` դատավոր Աննա Դանիեբեկյանի նախագահությամբ շարունակվում է Ռոբերտ Քոչարյանի եւ մյուսների գործով դատական նիստը։ «Փաստինֆո»-ի հաղորդմամբ՝ փաստաբան Հովհաննես Խուդոյանը ներկայացրեց միջնորդություններ՝ Ռոբերտ Քոչարյանի նկատմամբ անազատության հետ չկապված խափանման միջոց կիրառելու կամ կիրառել այլընտրանքային խափանման միջոց գրավը կիրառելու մասին։

Հովհաննես Խուդոյանը պարզաբանեց, որ այս միջնորդությունները ներկայացրած են եղել դեռեւս երեք ամիս առաջ՝ Վերաքննիչ դատարանի դատավոր Արմեն Դանիելյանին․ «Սակայն որոշում կայացնելիս մեր միջնորդությունները քննարկման առարկա չեն դարձել, այդպիսով դատական համակարգի կողմից խախտվել է  արդար դատաքննության իրավունքը»։

Հովհաննես Խուդոյանի խոսքով՝ դատավարության այս փուլում կալանավորումը կիրառելու անհրաեշտ հիմքերը բացակայում են․ «Նախաքննության փուլում Միքայել Հարությունյանի վերաբերյալ  ՀՔԾ հայտարաության մեջ նշված էր Ռոբերտ Քոչարյանի կողմից ենթադրյալ արարքների կատարատումը։ Դրանից հետո նա վերադարձել է ՀՀ, ներկայացել վարույթ իրականացնող մարմին։ Մշտապես ներկայացել է առաջին կանչով եւ մասնակցել է դատավարական գործողություններին։ Երբեւէ չի խոչընդոտել գործի քննությանը։ Շուրջ 4 ամիս գտնվելով ազատության մեջ՝ որեւէ միջամտություն չի ունեցել նախաքննության ընթացքին։ Այսինքն՝ վարույթին խոչընդոտելու հիմքը եղել է զուտ ենթադրյալ, սակայն եթե անգամ դա եղել է, ինչի հետ էլի համաձայն չենք, ներկայումս այն առկա չէ կամ էականորեն նվազել է»։

Հովհաննես Խուդոյանը նշեց, որ կալանավորման հիմքի բացակայության հետ մեկտեղ պետք է հաշվի առնել նրա անձը, եւ եթե անգամ դատարանը գտնի, որ առկա են խափանման միջոց կիրառելու հիմքեր, ապա իրենք միջնորդում են կիրառել այլընտրանքային խափանման միջոց գրավը․«Մենք գրավի չափ չենք նշում, թող այն որոշի դատարանը՝ միաժամանակ նկատի ունենալով, որ Ռոբերտ Քոչարյանի եւ իր մերձավորների գույքը առ այսօր ապօրինի որոշման հիման վրա գտնվում է արգելանքի տակ»։

Ելույթ ունեցավ նաեւ պաշտպաններից Հայկ Ալումյանը՝ հայտարարելով․ «Քիչ առաջ դատարանի կողմից կայացված որոշման պատճառ են հանդիսացել երեկ ՀՀ բարձրագույն պաշտոնատար անձանց կողմից կայացված հայտարարությունները եւ ուղիղ սպառնալիքները ՀՀ ՍԴ-ի հասցեին, որոնք իրենց էությամբ նաեւ դատարանին ուղղորդող արտահայտություններ էին, որովհետեւ այդ պաշտոնատար անձինք հանդգնեցին ասել, որ ՍԴ որոշումը ապօրինի է, եւ դրանով  Ձեզ, որպես դատավորի, ուղարկեցին հստակ կողմնորոշիչ մեսսիջ՝ ասելով, որ եթե այդ որոշոմը ապօրինի է, ապա ապօրինի կհամարեն նաեւ այդ որոշման հիման վրա Ձեր կայացրած որոշումը»։

Ալումյանը նշեց, որ սա առաջին դեպքը չէ, երբ որոշման նախորդ օրը բարձրաստիճան պաշտոնյաները խառնվում են դատական գործին․ «Ես համոզված եմ, որ Դուք, որպես դատավոր, չէիք կարող չզգալ այդ ճնշումը, եւ Ձեր որոշման վրա չէր կարող չազդել դա։ Այս պահի դրությամբ չկա որեւէ ողջամիտ պատճառ, որ մնալով ազատության մեջ՝ Ռոբերտ Քոչարյանը կխոչընդոտի կամ խուսափի դատաքննությունից»,-նշեց նա։

Ինչպես արդեն տեղեկացրել ենք՝ դատարանը մերժել է ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորումը վերացնելու փաստաբանների միջնորդությունը, որի քննարկումը սկսվել էր սեպտեմբերի 12-ին։

Գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։ Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու մեջ, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ։

Հիշեցնենք, որ ՍԴ-ն մասամբ բավարարել էր Ռոբերտ Քոչարյանի դիմումը եւ Հայաստանի Հանրապետության քրեական դատավարության օրենսգրքի 35-րդ հոդվածը` Սահմանադրության ուժով հատուկ պաշտպանությամբ օժտված պաշտոնատար անձանց գործառութային անձեռնմխելիությունը՝ քրեական գործի վարույթը կամ քրեական հետապնդումը բացառող հանգամանքների թվում չնախատեսելու մասով, ճանաչել Սահմանադրության 27-րդ հոդվածի 1-ին մասի 4-րդ կետին, 61-րդ հոդվածի 1-ին մասին, 63-րդ հոդվածի 1-ին մասին և 75-րդ հոդվածին հակասող և անվավեր: Իսկ Հայաստանի Հանրապետության քրեական դատավարության օրենսգրքի 135-րդ հոդվածի 2-րդ մասը համապատասխանում է Սահմանադրությանը:

Հեղինակ` Միլենա Խաչիկյան