Փաստ ինֆո

Երեւանի ընդհանուր իրավասության դատարանի Շենգավիթի նստավայրում դատավոր Աննա Դանիբեկյանի նախագահությամբ շարունակվում է ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստը։

«Փաստինֆո»-ի հաղորդմամբ` այս պահին մեղադրող կողմն առարկում է Ռոբերտ Քոչարյանի պաշտպանների միջնորդության դեմ։ Ավելի վաղ հայտնել ենք, որ Քոչարյանի պաշտպանները միջնորդեցին Քոչարյանի նկատմամբ կիրառել անազատության հետ կապ չունեցող խափանման միջոց կամ այլընտրանքային խափանման միջոց գրավ։ Նշենք, որ բոլոր ամբաստանյալների պաշտպանները միացան ներկայացված միջնորդությանը։

Մեղադրանքը պաշտպանող դատախազ Պետրոս Պետրոսյանը իր ելույթում նշեց, որ այն հանգամաքնները, որոնք ներկայացվեցին պաշտպանների կողմից, քննության առարկա են դարձվել Վերաքննիչ քրեական դատարանի հունիսի 25-ի որոշմամբ․ «Եվ պատահական չէ, որ դրանց հիման վրա էլ Դուք եւս կայացրել եք որոշում՝ խափանման միջոցը անփոփոխ թողնելու մասին»,-դիմեց նա նախագահող դատավորին։

Պետրոս Պետրոսյանը հիշեցրեց, որ քննության եւ վիճարկման առարկա են դարձվել այն հանգամանքները, որ կալանավորումը վերացնելուց հետո Ռոբերտ Քոչարյանը որեւէ գործողություն չի իրականացրել անօրինական ազդեցություն գործադրելու կամ քննությունից խուսափելու համար․«Երբ նշվում է, որ առողջական խնդիրներ ունենալով պայմանավորված՝ Ռոբերտ Քոչարյանը դիմել է վարույթն իրականացնող մարմնին՝ երկրից բացակայելու համար, այս հանգամանքները պետք է մեկուսի չդիտարկել, քանի որ ավիատոմսեր ամրագրելու հանգամանքը մեզ հայտնի է դարձել այլ աղբյուրներից, ոչ թե իրենցից, հետեւաբար՝ վարույթն իրականացնող մարմինը, դա դիտարկելով որպես խուսափելու փորձ, ինքն է նախաձեռնել խափանման միջոց կիրառելու գործընթացը»,-նշեց նա։

Ըստ դատախազի՝ պաշտպանների կողմից վկայակոչված այն հանգամանքը, որ պետք է հաշվի առնել մեղադրյալի անձը, մեղադրողի կողմից գնահատվել է ինչպես Վճռաբեկ դատարանի, այնպես էլ ՄԻԵԴ-ի որոշումների համատեքստում․ «Միայն այն հանգամանքը, որ անձը նախկինում զբաղեցրել է պետական պաշտոն, եւ դրանով պայմանավորված՝ ունի կապեր՝ թե ՀՀ ներսում, թե դրսում, Վերաքննիչ դատարանը հանգել է այն եզրահանգմանը, որ գործով անցնող անձանց նկատմամբ անօրինական ազդեցություն գործադրելու ռիսկերը մեծ են։ Այդ հիմքերը կային, եւ շարունակում են առկա լինել»։

Պետրոս Պետրոսյանը նշեց, որ քրեկան գործով անցնող անձանց ցուցմունքները իրենց համակցության մեջ մեղադրանքի կողմը գնահատել է որպես մեղադրանքը հիմնավորող էական փաստական հիմքեր․ «Եվ ի հավելումն սրան՝ նշեք, որ պաշտպանական կողմից ՍԴ որոշման հետ կապված հակասական իրավիճակ ներկայացվեց։ Բայց ՍԴ-ի կողմից որեւէ նորմի՝ Սահմանադրության համապատասխանության հարցը քննության առարկա դարձնելը այդ դատարանում գործի քննությունը դադարեցնելու հիմք չէ»։

Ելույթ ունեցավ նաեւ Երեւան քաղաքի դատախազ Գեւորգ Բաղդասարյանը, ով, անդրադառնալով պաշտպանական կողմի այն հայտարարությանը, թե այս գործով իրավական գործընթաց տեղի չի ունենում, պնդեց հակառակը․«Ես պնդում եմ, որ մենք իրավական կողմը դեռ դատական քննության փուլում ենք տեսնելու։ Հայտարարություններ են արվում, թե ցուցմունքները այս մեղադրանքների հետ չեն առնչվում, չեմ պատրաստվում առաջ ընկնել եւ բացահայտել դրանց կապը, բայց պնդում եմ, որ դրանց կապը մենք դեռ տեսնելու ենք։ Եվ ավելին, ոչ իրավական բնույթի են հակառակ կողմի հայտարարությունները, որոնք բխում են մամուլի հրապարակումներից կամ օդից կախված հայտարարություններից»։

Նշենք, որ միջնորդության քննարկման ժամանակ Ռոբերտ Քոչարյանի պաշտպաններից Արամ Օրբելյանը հայտարարեց, որ կան օդից կախված տեղեկություններ, թե որոշ մարդիկ այսօրվա որոշումից առաջ այցելել են դատավոր Աննա Դանիբեկյանին։ Այս հայտարարության դեմ առարկեց մեղադրող կողմը, ինչը ընդունեց պաշտպանական կողմը, եւ այդ հայտարարությունը հանվեց։

Երեւան քաղաքի դատախազի խոսքով՝ կալանավորման հիմքերի հետ կապված պաշտպանության հայտարարությունները հակասական են․ «Նշում են, որ քննությունից խուսափելու կամ ազդեցություն գործադրելու ռիսկերը կախատեսկան են, բայց եւ հավելում, որ Դատախազսությունը երբեւէ չի մեջբերել մի դեպք, երբ ներգործած կլինեն։ Այսինքն՝ պաշտպանության կողմը ընդունում է, որ դրանք կանխատեսական են, բայց ուզում է, որ ներկայացնենք ռեալ հիմքե՞ր։ Կալանավորման հիմքերը եղել եւ շարունակում են մնալ կանխատեսական, դրանք վերացական չեն, դրանք հիմնվել են Ռոբերտ Քոչարյանի անձի, բնութագրի, շփումների, կապերի, նրա՝ ՀՀ-ից դուրս գալու հաճախականության, քրեական գործով անցնող անձնաց հետ նրանց նախկին կապի, քրեական գործի անջատված եւ նախաքննությունը շարունակող մայր քրեական գործի վրա»։

Ըստ դատախազի՝ մայր քրեական գործով դեռեւս գնահատականներ են տրվելու պաշտոնատար անձանց գորոծղությունների, որոնք ուղիղ կամ ոչ ուղիղ կապի մեջ են գտնվել Ռոբերտ Քոչարյանի հետ․ «Դեռ կհետազոտենք այդ ցուցմունքները, եւ նոր կկարողանանք գնահատական տալ՝ ում ցուցմունքն է իրականությանը համապատասխան, ումը՝ ոչ։ Մենք պնդում ենք, որ կալանավորման հիմքերը սույն գործում առկա են, չեն վերացել։ Այդ հիմքերը ռեալ են, եւ Ռոբերտ Քոչարյանի ազատության մեջ գտնվելը լուրջ վտանգներ է ներկայացելու ինչպես սույն քրեական գործի, այնպես էլ ՀՔԾ-ում քննվող քրեական գործի համար»,-ամփոփեց Գեւորգ Բաղդասարյանը։

Հեղինակ` Միլենա Խաչիկյան