Փաստ ինֆո

Դեկտեմբերի 7-ին՝ կալանավորման որոշումից հետո իմ ծառայողական մեքենայով գնացել եմ ՔԿՀ, մեկ ժամից ավել սպասել քննիչին, զանգել նրան, որ գա։ Քննությունից փախչող մարդն այսպիսի բան չէր անի։ «Փաստինֆո»-ի հաղորդմամբ այս մասին դատարանի դահլիճում ասաց ՀՀ երկրորդ նախագահ Ռոբերտ Քոչարյանը։

«Իմ և քրեական գործով մյուս մեղադրյալների առնչությունն այս գործում որևէ կերպ արտահայտված չէ, զրո է։ Ես համարում եմ, որ սա խորը անպարկեշտության դրսևորում է։ Ես չեմ պատրաստվում ո՛չ փախչել, ո՛չ ազդել»,-ասաց Ռոբերտ Քոչարյանը՝ համոզմունք հայտնելով, որ դատարանում գտնվող անձինք արդարացվելու են։ ՀՀ երկրորդ նախագահի խոսքով ոչ թե տուժածներն են ուղղորդում փաստաբաններին, այլ հակառակը. «Ես տեսնում եմ, որ փաստաբաններն ակնհայտ քաղաքական դիրքորոշումներ են արտահայտում՝ Նոր Հայաստանի, հեղափոխության մասին։ Նորը-հինը չգիտեմ, բայց օրենսգիրքը նույնն է, Սահմանադրությունը նույնն է»,-նկատեց Ռոբերտ Քոչարյանը։

Վերջինիս փոխանցմամբ, երբ առաջին ծանուցումը ստացել է, Հունաստանում է եղել և գիտակցելով, որ մեղադրանք է առաջադրվելու և կալանավորելու փորձ է արվելու, այնուամենայնիվ հետ է վերադարձել. «Ես հստակ գիտեի՝ ուր եմ գնում, եւ ինչ է ինձ սպասվում։ Չես գալիս՝ աղմուկ է բարձրանում, որ փախար, պատասխանատվությունից խուսափեցիր, այսինքն՝ ողջ կենսագրությունդ կվերաշարադրեն։ Սա է եղել իմ ետ գալու մոտիվացիան»,-նշեց Ռոբերտ Քոչարյանը։

Երկրորդ նախագահը նկատեց՝ ասում են նախկինում պաշտոն է զբաղեցրել և կարող է ազդել քննիչների, իրավապահ մարմինների, վկաների վրա, սակայն ընդգծեց, որ իր պաշտոն զբաղեցնելու հանգամանքն այսօր իր օգտին չի խոսում. «Ո՞նց պիտի ես ազդեմ ներկա Գլխավոր դատախազի, ՀՔԾ պետի առկայության պարագայում։ Իմ առաջին ելույթի ժամանակ նշեցի, որ մի քանի հոգու հետ եմ ունեցել շփում, մնացած 80 հատորի մեջ ես չկամ, այդ պարագայում ասել, որ ես կարող եմ ազդել..., ազդելու սուբյեկտ քրեական գործում գոյություն չունի»,-հավելեց Ռ. Քոչարյանը։

Մանրամասները՝ տեսանյութում

Աղբյուր` Փաստինֆո