Փաստ ինֆո

ՀՀ ոստիկանության կազմակերպված հանցավորության դեմ պայքարի գլխավոր վարչությունում «առերևույթ» հանցագործության հատկանիշներով հարուցված քրեական գործը պետության պատասխան քայլն էր նախկին փոխվարչապետ Արմեն Գեւորգյանի կողմից «Իմ քայլը» խմբակցության պատգամավորի դեմ ներկայացրած հայցադիմումի։ «Փաստինֆո»-ի հետ զրույցում նման կարծիք է հայտնել Արմեն Գեւորգյանի փաստաբան Ալեքսանդր Կոչուբաևը։

Նշենք, որ խոսքը վերաբերում է Երևան քաղաքի Բուզանդի փողոցի՝ հանրային շահ ճանաչված հատվածն իրացնելու գործընթացում առերևույթ կոռուպցիոն չարաշահումներ կատարելու դեպքի առթիվ քրեական գործին, որի մասին հայտնի դարձավ սեպտեմբերի 13-ին՝ Արմեն Գեւորգյանի կողմից ներկայացված հայցադիմումից օրեր անց։

Ինչպես ավելի վաղ «Փաստինֆո»-ն տեղեկացրել է՝ Ազգային անվտանգության խորհրդի նախկին քարտուղար, ՀՀ երկրորդ նախագահի աշխատակազմի ղեկավար Արմեն Գեւորգյանը սեպտեմբերի 2-ին հայցադիմում է ներկայացրել դատարան՝ ընդդեմ «Իմ քայլը» խմբակցության պատգամավոր Արուսյակ Ջուլհակյանի եւ փաստաբան Մուշեղ Շուշանյանի։ Հայցադիմումի պատճառ է դարձել օգոստոսի 7–ին տեղի ունեցած ասուլիսի ընթացքում փաստաբան Մուշեղ Շուշանյանի, ինչպես նաեւ Ջուլհակյանի հնչեցրած մտքերը առ այն, թե հստակ տեղեկություններ կան, որ հենց Ռոբերտ Քոչարյանի աշխատակազմի ղեկավարն է ներգրավված եղել, մասնակցել կոռուպցիոն գործընթացներին։ Ա.Գեւորգյանը դատական կարգով պահանջել է, որ պատգամավորն ու փաստաբանը հերքեն վիրավորանք և զրպարտություն համարվող տեղեկությունները, հրապարակային ներողություն խնդրեն և փոխհատուցեն՝ պատճառված բարոյական վնասի համար, ինչպես նաեւ արձանագրվի իր անմեղության կանխավարկածի խախտումը։
Մինչ դատական մարմինները կլսեն հայցը՝ 2012թ. www.hetq.am ինտերնետային կայքում հրապարակված՝«Ամերիկահայ Պավել Անդերսոնը ասում է, որ կաշառել է քաղաքապետարանի ու դատարանների ներկայացուցիչներին» վերտառությամբ հոդվածին հիման վրա՝ իշխող ուժի պատգամավորի հայտարարությունները հիմք ընդունելով ոստիկանությունում հարուցվել է քրեական գործ՝ ՀՀ քրեական օրենսգրքի 309-րդ հոդվածի 3-րդ մասով, 311-րդ հոդվածի 4-րդ մասի 2-րդ կետով և 312-րդ հոդվածի 3-րդ մասի 1-ին կետով, որով նախաքննության կատարումը հանձնարարվել է ՀՔԾ-ին։

«Իմ խորին համոզմամբ, դա պետության արձագանքն էր մեր ներկայացրած հայցադիմումին։ Դրանով ընդամենը փորձ է արվում լռեցնել պարոն Գեւորգյանին, ինչը, ինչպես տեսնում եք, չի ստացվել»,-«Փաստինֆո»-ին ասաց փաստաբանը։

Մեզ հետ զրույցում Ալեքսանդր Կոչուբաևը ասաց, որ ՄԻԵԴ-ի վերջնական որոշումից հետո, երբ Հայաստանի կառավարությանը պարտավորեցրել էր՝ Յուրի Վարդանյանին վճարել փոխհատուցում, տիկին Ջուլհակյանը եւ փաստաբան Մուշեղ Շուշանյանը զրպարտություն համարվող տեղեկություն էին տարածել, թե Արմեն Գեւորգյանը ներքաշված է եղել կոռուպցիոն գործընթացների մեջ։ Ըստ փաստաբանի, Արուսյակ Ջուլհակյանն էլ իր հերթին զրպարտել էր, թե Արմեն Գեւորգյանը զանգվածային ունեզրկումներն է կոորդինացրել։ Եվ, այս հայցադիմումից հաշված օրեր անց, Արմեն Գեւորգյանը կանչվել է բացատրություն տալու։ «Երբ այդ հիմքով մենք դիմեցինք դատարան՝ զրպարտություն համարվող տեղեկությունը հերքելու եւ փոխհատուցման պահանջով, պարոն Գեւորգյանին կանչեցին ոստիկանություն եւ հարուցվեց քրեական գործը»,-մանրամասնեց փաստաբանը։

Ալեքսանդր Կոչուբաեւի խոսքով, սույն գործով կաշառք ստանալու մեջ շոշափվում է նաեւ դատավոր Մնացական Մարտիրոսյանի անունը, որը կայացրել է Նիկոլ Փաշինյանի գործով մեղադրական դատավճիռը եւ ներկայումս քննում է Մանվել Գրիգորյանի գործը։ «Իմ խորին համոզմամբ, սա ուղղակի պարոն Մնացական Մարտիրոսյանի վրա ազդելու գործիք է »,-ասաց փաստաբանը։
Ալեքսանդր Կուչուբաեւն ինքնին խնդրահարույց է համարում այն ապացուցողական բազան, որի հիման վրա Ոստիկանության կազմակերպված հանցավորության դեմ պայքարի գլխավոր վարչություն հարուցել է քրեական գործը։

«Մի քանի օր անց մենք նաեւ լրացուցիչ տեղեկություն կհայտնենք այս առումով, թե ինչու չէր կարող հարուցվել այդ քրեական գործը»,-ասաց փաստաբանը եւ ուշագրավ մանրամասներ ներկայացրեց Պավել Անդերսոնի կերպարից, որի խոսքերը տարիներ անց հիմք են հանդիսացել քրեական գործի հարուցման համար։

«Ի սկզբանե շրջանառվեց Պավել Անդերսոն անունը, հետագայում պարզվեց, որ նա նախկինում Պավել Հակոբյանն էր, երեկ էլ մամուլում տեղեկություն հայտնվեց, որ Պավել Հակոբյան չէ , այլ Պետրոս Անդրեասյան եւ նշվում է , որ ամերիկահայ է, ՌԴ-ն նրան հետախուզում է որպես ադրբեջանցի։ Այս է Պավել Անդերսոնի կերպարը»,- ասաց փաստաբանը։

Ըստ նրա տեղեկությունների՝ իշխանության բարձրաստիճան ներկայացուցիչները ԱՄՆ-ում հանդիպում են ունեցել կամ Պավել Անդերսոնի կամ նրա ներկայացուցիչների հետ ։ «Այդ փուլում է որոշվել ՝ 2012 թ-ին Պավել Անդերսոնի հայտնած տեղեկություններն ակտիվացնել։ Մենք տեղեկություն ունենք, որ երբ մեր պատվիրակությունը ԱԺ-ի մակարդակով գտնվում էր ԱՄՆ-ում, այնտեղ հանդիպում է եղել Պավել Անդերսոնի կամ գոնե իր ներկայացուցիչների հետ։ Մենք մտահոգիչ ենք համարում, որ մեր իշխանության ներկայացուցիչները տեղյակ լինելով, որ ՌԴ-ն նրան հետախուզում է առանձնապես խոշոր չափի խարդախություն կատարելու համար, փոխարենը, որ ՌԴ-ին հայտնեն նրա գտնվելու վայրի մասին, նրա հետ համագործակցում են ։ Փաստորեն այս ամբողջ քրեական գործն ստեղծվել է ՝ հիմք ընդունելով Պավել Անդերսոնի հետ կապված հայտնի հոդվածը»։

Ըստ փաստաբանի, սա գործարք է ՀՀ իշխանությունների եւ Պավել Անդերսոնի միջեւ.« Բայց այդ պրոյեկտը տապալվեց, քանի, որ մենք հրապարակել ենք, որ նա հետախուզման մեջ է եւ Պավել Անդերսոնին չեն կարող հրավիրել Հայաստան, որ նա պնդի իր ցուցմունքները եւ մենք ունենք ընդամենը սկայպի մակարդակում տեղեկություն, որի հիման վրա հիմնվելով ոստիկանության 6-րդ վարչությունը հարուցեց քրեական գործը։ Ոստիկանությունը եւս մակերեսային էր նայել գործին։ Այն տեղեկությունը, որ նա ադրբեջանցի է եւ հետախուզվում է ՌԴ ոստիկանների կողմից , մենք ենք փոխանցել նրանց»,-եզրափակեց Կուչուբաեւը։

Աղբյուր` Փաստինֆո