Փաստ ինֆո

Ազգային Անվտանգության ծառայության ղեկավար Արթուր Վանեցյանի հրաժարականը՝ իր պատճառահետևանքային   հարցականներով հանդերձ շատ հստակ մեսիջներ է պարունակում: Ընդ որում, այս խարսխային պաշտոնյայի  հրաժարականը երբ  դիտարկում ենք  ժամանակի, այսինքն՝ ընտրված պահի և՛ բովանդակության համատեքստում, առավել ևս՝ հրաժեշտից առաջ երկրին ուղղված  վերջին ցանկություն որպես ամենակարևորների կարևորմամբ, այն է՝ խաղաղություն և անվտանգություն,  շոշափելի, մի տեսակ՝ առաջին ձեռքից  զգում, պարզորոշ հասկանում ենք, որ սպայի պատիվը նրան թույլ չի տվել այլևս հանդուրժել անհանդուրժելին:

Բնական հարց է ծագում ՝ ինչու՞ պիտի հրաժարական ներկայացնի պաշտոնյան, որը Փաշինյանի կառավարությունում հարգանք վայերող և ադեկվատ մատների վրա հաշվելի դեմքերից էր: Այն էլ՝ ԱԱԾ տնօրենը: Այսօրվա հայտարարությունը հստակ նշան է,  որ ակնհայտ և այլևս անհամատեղելի տարաձայնություններ կան Փաշինյանի և Վանեցյանի միջև: Ընդ որում, այդ տարաձայնությունները դեռևս պաշտոնավարման վաղ շրջանում  էլ արտաքուստ նշմարվում էին:  Դատելով Փաշինյան-Վանեցյան- Սասուն Խաչատրյան գաղտնալսումների ընթացքում հիշյալ անձանց կարևորումներից և ակնհայտ -առկա՝ մեկի դեպքում՝ տագնապի, մեկ այլ դեպքերում՝ թքած ունենալու մոտիվներից և առաջնահերթություններից, չենք կարող չարձանագրել, որ Վանեցյանը, թերևս, միակ սթափեցնող պաշտոնյան էր, որին հատուկ էր պետական մտածելակերպը: Հիշենք, թեկուզ ՀԱՊԿ-ի և Յուրի Խաչատուրովի դրվագը, որի հետ կապված՝ հնարավոր  վտանգների և  հետագա զարգացումների մասին զգուշացնում էր երկրի վարչապետին:

Սա սկիզբն էր, նոր իշխանությունների նախամուտն էր, այսպես ասած: Եվ  ուրեմն՝ աշխատանքային դաշտը այլևս  ինչ  աստիճանի անհնարին է եղել, որ ԱԱԾ տնօրենը որոշել է հրաժարական ներկայացնել:

Մեծ հաշվով՝  Վանեցյանի հրաժարականի բովանդակությունը կարծես բաց տեքստով լինի, զգուշացում որպես՝ թե ինչ փխրուն վիճակում է երկրի անվտանգությունը:

Հայրենիքն ու սպայի պատիվը վեր են ամեն ինչից՝ գրել է Վանեցյանը և կատարել կոնկրետ շեշտադրումներ: Այնքան կոնկրետ, որ ավելին ասելը պիտի նշանակեր՝ հատ-հատ, ոլորտ առ ոլորտ թվարկել: Այն, ինչ ասում է ԱԱԾ տնօրենն իր հրաժարականի տեքստում, ահազանգի հանգույն է.  «Պետականաշինությունն իր տրամաբանությունն ունի` որոշումների տարերայնությունը, գործողությունների հախուռնությունը, առաջնայինը երկրորդականից, իսկ անցողիկը մնայունից չտարբերելու գործելաոճն այն ճանապարհը չէ, որը տանում է դեպի նպատակների իրականացում։ Այն ընդհանուր ոչինչ չունի սպայի արժանապատվության հետ. սպայի ուսադիրն ու զարգացումների նման ընթացքն անհամատեղելի են։ Իմ հրաժարականը թող լինի «Կանգ ա՛ռ»-ի սթափեցնող քայլ, մնացած բոլոր տարբերակներում կհաղթանակի հայրենիքի հանդեպ պարտքը»:

Ամենակարևորը՝ ի՛նչ պիտի հետևի Վանեցյանի  հրաժարականում  նախանշված  զգուշացումներին կամ ավելի ճիշտ՝ պետությանը,   պետականաշինությանն ուղղված սպառնալիքների դիմակայման ուղղությամբ ի՞նչ քայլեր պիտի արվեն:

Սա ամենակարևոր հարցն է, որ պիտի կարողանանք ձևակերպել և առաջ ընթանալ, ընդ որում, արդեն իսկ առաջնայինը երկրորդականից ու տասներորդականից չտարբերակող ուժերի և անձանց,  զանազան տրանսօթյակների, սորոսական գաղափարներով սնվածների, աղանդավորների հույսին չթողնելով երկիրը: Մի կողմ չքաշվելով:

ԱԱԾ տնօրենի հրաժարականի գլխավոր ուղերձը հստակ է՝ վտանգված է մեր ազգային անվտանգությունը:

Հեղինակ` Ա.Եսայան

Աղբյուր` Փաստինֆո