Փաստ ինֆո

Տնտեսագետ «Այլընտրանք» հետազոտական կենտրոնի ղեկավար Թաթուլ Մանասերյանը կարծում է, որ կառավարության ներկայացրած ՀՀ քրեական դատավարության օրենսգրքում լրացում կատարելու մասին» և ««Բանկային գաղտնիքի մասին» ՀՀ օրենքում լրացում կատարելու մասին» օրինագծերի փաթեթը պետք է մասնագիտական քննարկում անցնի։

«Կան դրույթներ, որոնք կարելի է քննարկել, բայց ես դեմ եմ ծայրահեղացնելուն, չափազանցնելուն եւ հայտարարելուն, որ մեր տնտեսությանը վնաս ենք տալիս»,-«Փաստինֆո»-ի հետ զրույցում ասաց Թաթուլ Մանասերյանը։

Ըստ Մանասերյանի ռիսկերից մեկն այն է, որ չափազանցված եւ քաղաքականացված մտահոգությունները կարող են ազդել բանկային համակարգի վրա,որը շատ զգայուն է. «Մենք անզգույշ խոսակցություններով կարող ենք անուղղակիորեն վնասել ինքներս մեզ, որովհետեւ դա, ի վերջո, ազգային արժույթին է վերաբերում՝ ոչ միայն բանկերին։ Այս տարընթերցումներից խուսափելու համար, եթե ոչ հանրային , ապա մասնագիտական քննարկման կարիք կա, ֆինանսական ոլորտի փորձագետները, բանկային համակարգի, օրենսդիր մարմնի ներկայացուցիչները պետք է քննարկեն նախագիծը՝ նման մտահոգությունները փարատելու համար»։

Հիշեցնենք, որ կառավարությունն ընդունել է «ՀՀ քրեական դատավարության օրենսգրքում լրացում կատարելու մասին» և ««Բանկային գաղտնիքի մասին» ՀՀ օրենքում լրացում կատարելու մասին» օրինագծերի փաթեթը, որով նախատեսվում է առանձին դեպքերում հնարավորություն ստեղծել՝ ստանալ բանկային գաղտնիք կազմող տեղեկություններ առանց սուբյեկտային սահմանափակման: Ներկայիս կարգավորումներով նման տեղեկություններ հնարավոր է ստանալ միայն կասկածյալ ու մեղադրյալ հանդիսացող անձանց վերաբերյալ։

Թաթուլ Մանասերյանի խոսքով, բանկային գաղտնիքի գաղտնազերծումը պետք է երկու հարթության վրա դիտարկել եւ գործընթացն, ըստ նրա, հեշտ լինել չի կարող. «Ընդհանուր առմամբ, առեւտրային բանկերը եւ Կենտրոնական բանկը ոչ միայն բանկային համակարգի, այլեւ հաճախորդների շահերից ելնելով, չեն կարող թույլ տալ, որ բանկային գաղտնիքը հասանելի լինի լայն շրջանակների, որովհետեւ դա հակառակ էֆեկտը կբերի եւ հաճախորդները շատ չեն վստահի բանկերին։ Երկրորդ, պետք է հիշենք, որ կան միջազգային չափորոշիչներ, որոնք կանոնակարգվում են միջազգային իրավական նորմերով եւ այս առումով Հայաստանը բացառություն չէ»։

Ըստ Մանասերյանի, միայն կոռուպցիոն բնույթի հանցագործություններով հարուցված գործերի դեպքերում կարող է օրինագիծը կիրառվել ։ «Նախագծում հանցագործությունների սպառիչ ցանկը տրված է, պետք է լինի դատարանի հիմնավորված եւ պատճառաբանված որոշում, այսինքն, բավականին լուրջ պատճառաբանություններ եւ հիմնավորումներ պետք է լինեն եւ, ոչ ավել, ոչ պակաս՝ գլխավոր դատախազի միջնորդությունն է պետք։ Այն պետք է պարունակի ծանրակշիռ փաստեր»,-նշեց Թաթուլ Մանասերյանը։
Դիտարկմանը, արդյո՞ք նախագիծը չի վախեցնի ներդրողներին, Մանասերյանն արձագանքեց. «Այն ներդրողները, որոնք գումարներն այլ ճանապարհով են ձեռք բերել, թող վախենան։ Չեմ կարծում, որ նման բան կլինի, որովհետեւ այդ մտահոգությունը նաեւ պետությանն է»,-ասաց Թաթուլ Մանասերյանը։

Աղբյուր` Փաստինֆո