Փաստ ինֆո

Մասիսի քաղաքապետ Դավիթ Համբարձումյանը առաջադրված մեղադրանքում իրեն մեղավոր չի ճանաչել: Այս մասին «Փաստինֆո»-ն տեղեկացավ վերջինիս պաշտպան Զորայր Հարությունյանից:

Հիշեցնենք, որ երեկ Երեւանի ընդհանուր իրավասության դատարանի Շենգավիթի նստավայրում մեկնարկել էր Մասիսի քաղաքապետ Դավիթ Համբարձումյանի եւ եւս 7-ի գործով դատական նիստը, որը նախագահում էր դատավոր Ռոբերտ Պապոյանը: Տուժողների մեծ մասի բացակայության պայմաններում նիստի շարունակության հարցը քննարկելուց հետո մեղադրող կողմը հրապարակել էր մեղադրական եզրակացությունների համառոտ բովանդակությունը:

Մեզ հետ զրույցում քաղաքապետի պաշտպան Զորայր Հարությունյանը տեղեկացրեց, որ մեղադրական եզրակացության հրապարակումից հետո ամբաստանյալները դրա վերաբերյալ հանդես են եկել դիրքորոշմամբ. «Գործով բոլոր ամբաստանյալները, բացի մեկից, դիրքորոշում են հայտնել մեղադրանքի վերաբերյալ՝ նշելով, որ առաջադրված մեղադրանքում իրենց մեղավոր չեն ճանաչում»,-ասաց Հարությունյանը:

Դիրքորոշում չի հայտնել միայն ամբաստանյալ Արմենակ Հակոբյանը: Վերջինիս պաշտպան Սուրեն Մնացականյանը «Փաստինֆո»-ի հետ զրույցում նշեց, որ առանձնահատուկ պատճառ դրա համար չի եղել: Ըստ պաշտպանի՝ դա կապված է մեղադրանքի հստակության հետ. «Մենք համաձայն չենք մեղադրանքի հետ, դրանում արտացոլված չեն գործողություններ, որոնք կարող են վերագրվել իմ պաշտպանյալին: Այսինքն՝ իմ պաշտպանյալը դիրքորոշում չհայտնեց՝ այդ աբսուրդային իրավիճակից ելնելով. դա էլ իր դիրքորոշումն է»,-նշեց Մնացականյանը:

Հավելենք, որ երեկ՝ նիստի ընթացքում, սահմանվել է ապացույցների հետազոտման հաջորդականությունը: Ըստ այդմ, սկզբնապես կուսումնասիրվեն գործում առկա տեսանյութերը, ապա՝ մեղադրանքի կողմի վկայակոչած փաստաթղթային ապացույցները, որից հետո կհարցաքննվեն վկաները, տուժողները եւ նոր միայն ամբաստանյալները:

Հաջորդ դատական նիստը նշանակվել է սեպտեմբերի 19-ին:

Ավելի վաղ հայտնել ենք, որ ըստ դատական-տեղեկատվական համակարգի՝ Դավիթ Համբարձումյանին մեղադրանք է առաջադրվել այն բանի համար, որ նա 2018թ․ ապրիլի 22-ին Արարատի մարզի Հայանիստ-Հովտաշատ գյուղերի խաչմերուկի բանուկ հատվածում մի խումբ անձանց հետ դիտավորությամբ կոպիտ կերպով խախտել է հասարակական կարգը, որն արտահայտվել է հասարակության նկատմամբ բացահայտ անհարգալից վերաբերմունք և զուգորդվել նույն օր՝ ժամը 19։00-ի սահմաններում, Հանրապետության հրապարակում կայանալիք հանրահավաքին մասնակցելու նպատակով դեպի նշված հրապարակ երթ կազմակերպած մասնակիցների նկատմամբ նախապես իրենց հետ վերցված զենքի և որպես զենք հանդիսացող առարկաների գործադրմամբ բռնություն գործադրելով և գույքը ոչնչացնելով։ Նրան մեղադրանք էր առաջադրվել նաեւ ապրիլի 22-ին Էրեբունիում տեղի ունեցած անկարգությունների գործով։ Սակայն հետագայում այդ մասով նրա նկատմամբ քրեական հետապնդումը դադարեցվել է։ Դատախազության հանրային կապերի բաժնի պետ Արեւիկ Խաչատրյանը մեզ հետ զրույցում նշել էր, որ այդ մասով հետապնդումը դադարեցվել է հանցակազմի բացակայության հիմքով։

Քաղաքապետի եղբորը՝ Գոռ Համբարձումյանին, մեղադրանք է առաջադրվել այն բանի համար, որ նա, 2018թ․ ապրիլի 16-ին հասարակական կարգը խախտելու դիտավորությամբ խմբի կազմում բացահայտ անհարգալից վերաբերմունք դրսևորելով , սեփական անձը վեր դասելով, հասարակության մեջ առանց պատճառի 5 րոպե տևողությամբ հայհոյանքներ է հնչեցրել Հերացի և կորյուն խաչմերուկները փակած ցուցարարների հասցեին, որի ընթացքում բռնություն գործադրելով՝ ձեռքերով և ոտքերով հարվածներ է հասցրել նրանց։

Գործով մյուս ամբաստանյալները մեղադրվում են քննությամբ դեռևս չպարզված մի խումբ անձանց հետ անհայտ անձի կողմից կազմակերպված զանգվածային անկարգություններին մասնակցելու, ցուցարարների հասցեին հայհոյանքներ հնչեցնելու եւ խուլիգանական մղումներով գույքային վնաս պատճառնելու մեջ։

Հեղինակ` Միլենա Խաչիկյան