Փաստ ինֆո

«Այլ կերպ ասած, որակապես այլ հայկական պետության կայացման համար շարժվում ենք առաջ՝ առանց հետ նայելու և առանց ՛՛անցյալի՛՛ հետ պայմանավորվելու և նրանց հետ հաշվի նստելու:» Այս մասին ֆեյսբուքյան իր էջում գրել է փաստաբան Նորայր Նորիկյանը՝ անդրադառնալով քաղաքական համակարգի խնդիրներին։

«Մեր երկրի բարեկեցության արմատական վերափոխումը դեպի զարգացման ավելի բարձր մակարդակ պայմանավորված է լինելու քաղաքական խնդիրների լուծումից:

Կլուծե՞նք երկրի քաղաքական խնդիրները, ուրեմն պատուհան կբացենք բոլորիս համար լավ ու հարմարավետ կյանք ստեղծելու, չե՞նք լուծի, ուրեմն միշտ կմնանք նույն կոտրած տաշտակի առաջ:
Ինձ համար առաջին հերթին քաղաքական խնդիրը պետության ժողովրդավարացման գործընթացն անշրջելի դարձնելն է, երկրի անվտանգության հուսալի համակարգի անխափան աշխատանքի ապահովումն է, իսկական սահմանադրական գերակայության մտածողության ձևավորումը և կոռուպցիայից զերծ պետական համակարգի և հասարակության ստեղծումը:

Այս ռազմավարական խնդիրների լուծումը հնարավոր կլինի միայն մի դեպքում, եթե օրինականության վերականգնման գործընթացն հասնի իր տրամաբանական ավարտին, իսկ դա նշանակում է, որ այն հնարավոր է կյանքի կոչել միայն արդար դատական համակարգի գոյության պայմաններում:
Վերը նշվածի լույսի ներքո առանցքային նշանակություն է ստանալու քաղաքական համակարգի առողջացման հարցը:

Սա հարցերից ամենակարևորն է: Այս համակարգի դերակատարները ստանձնելու են ահռելի և պատմական առաքելություն՝ երկրի քաղաքական խնդիրները լուծելու համար:

Գոնե իմ պատկերացմամբ քաղաքական համակարգի այս զամբյուղում կարող են տեղավորվել բացառապես այնպիսի ՛՛Գլուխներ՛՛, ովքեր չեն մնացել ՛՛անցյալում՛՛, ովքեր չեն ՛՛սնվել՛՛ ու ՛՛մեծացել՛՛ անցյալի բարիքներով, ովքեր իրենց քաղաքական պլանները չեն կառուցում իրենց ՛՛պապաների՛՛ աշխարհընկալումներով ու գործելակերպով...

Այլ կերպ ասած, որակապես այլ հայկական պետության կայացման համար շարժվում ենք առաջ՝ առանց հետ նայելու և առանց ՛՛անցյալի՛՛ հետ պայմանավորվելու և նրանց հետ հաշվի նստելու:»

Աղբյուր` Փաստինֆո