Փաստ ինֆո

ԱԺ «Բարգավաճ Հայաստան» խմբակցության պատգամավոր Սերգեյ Բագրատյանն օրենքի նախագիծ է առաջարկել, ըստ որի «ԱԺ պատգամավորի գործունեության երաշխիքների մասին» օրենքում փոփոխություն կկատարվեն։

Մասնավորապես, ըստ օրենքի նախագծի պատգամավորի գրավոր հարցումը կամ առաջարկը կքննարկվի տասնօրյա ժամկետում և գրավոր պատասխան կտրվի։

Հիշեցնենք, որ «ԱԺ պատգամավորի գործունեության երաշխիքների մասին» օրենքի 6-րդ հոդվածի 2-րդ կետի սահմանում է՝ իրավասու պաշտոնատար անձինք պարտավոր են՝ երկշաբաթյա ժամկետում քննարկել պատգամավորի գրավոր հարցումը կամ առաջարկը և գրավոր պատասխանել նրան։ Եվ պատգամավորի բարձրացրած հարցի քննարկումը կազմակերպելու դեպքում հնարավորինս սեղմ ժամկետում տեղեկացնել նրան:

«Բացառիկ դեպքերում, եթե գրավոր հարցման մեջ նշված տեղեկատվությունը տրամադրելու կամ առաջարկը քննարկելու համար անհրաժեշտ է կատարել լրացուցիչ աշխատանք, ապա այդ տեղեկությունը պատգամավորին է տրվում դիմումը ստանալուց հետո, 30-օրյա ժամկետում, հարցումը կամ առաջարկը ստանալուց հետո պատգամավորին տեղյակ պահելով հետաձգման պատճառների մասին»,-ասաց Բագրատյանը։

Նա նշեց, որ պատգամավորներն աշխատելով պետական համակարգի հետ բազմաթիվ խնդիրներ են ունենում, երբ պատգամավորների գրավոր հարցումներին պատասխանում են ուշացումով և այլևս ոչ ակտուալ պատասխաններ են ստանում։

«Մենք կորցնում ենք քաղաքացիների հարցումները, քաղաքացիների կարիքները ժամանակին սպասարկելու մեր հնարավորությունը։ Այս իմաստով, 10-օրյա ժամկետ ենք սահմանում, որը համաձայնեցված է նաև Կառավարության հետ, և այն օպտիմալ ժամկետ է պատգամավորին հստակ պատասխան փոխանցելու համար»,-ասաց ԲՀԿ պատգամավորը։

Հեղինակ` Սոնա Գեւորգյան