Փաստ ինֆո

«ՍԴ-ն քննության առարկա է դարձրել այս գործով Քրեական դատավարության օրենսգրքի 35-րդ հոդվածում ենթադրյալ օրենսդրական բաց»,- այս մասին Երևան քաղաքի ընդհանուր իրավասության դատարանում տեղի ունեցած այսօրվա դատական նիստում հայտարարել է փաստաբան Տիգրան Եգորյանը։ Վերջինս նշեց, որ ՍԴ կողմից այս որոշմամբ արտահայտված տարբեր գնահատականներ և տարբեր եզրահանգումներ ցույց են տալիս, որ այդ բացն այդքան էլ բաց չէ և իրականում՝ առաջնորդվելով ՀՀ Սահմանադրությամբ և Քրեական դատավարության օրենսգրքով հնարավոր է հստակ և որոշակիորեն լուծել այն խնդիրը, որը բարձրացրել է դիմողը՝ ՍԴ առջև։

«ՍԴ-ն ենթադրում է՝ առնվազն իր համար տեսանելի իրավական դաշտում բացակայություն այն պետական մարմինների պարտավորությամբ քննելու գործառութային անձեռնմխելիության հարցը, որոնք առնչվել են այս գործի շրջանակներում ինչպես՝ մեղադրանքի իրավաչափության հարցի գնահատմամբ, այնպես էլ՝ խափանման միջոցի կիրառման հարցի իրավաչափության գնահատմամբ»,-մանրամասնեց Եգորյանը։

Նրա խոսքով՝ նման պարտականության բացակայություն ՀՀ օրենսդրությունը և Սահմանադրությունը չունի, որի պատճառն այն է, որ որևէ կերպ Սահմանադրությամբ սահմանված անհրաժեշտությունների կատարման պարտականությունները շարունակում են կրել այն իրավասու պետական մարմինները, որոնք առնչվում են այդ սահմանումներով սահմանված կառուցակարգերին։

«Տվյալ դեպքում դա անձեռնմխելիության ինստիտուտն է։ Այս մասով Սահմանադրությունը գործում է անկախ նրանից, թե Քրեական դատավարության որևէ հոդվածով սահմանված կլինի այդ անձեռնմխելիության կապակցությամբ կոնկրետ գործողություն կատարելու, թե չկատարելու հարցը։»,- հայտարարեց Եգորյանը։

Փաստաբանը նաև նշեց, որ Սահմանադրության 5-րդ և 6-րդ հոդվածներն ապահովում են անձեռնմխելիության ինստիտուտի պարտադիր կիրառման անհրաժեշտությունը և Քրեական դատավարության օրենսգիրքն իր բաղկացուցիչն է համարում Սահմանադրությունը։

«Ես կարծում եմ սպառում են այն հարցը, թե Սահմանադրությամբ սահմանված անձեռնմխելիության ինստիտուտի կիրառությունը անհնարին է առանց դրա «սովորական օրենքում» ամրագրման։»,- նշեց Եգորյանը։

Նրա խոսքով՝ դատարանները իրավասություն ունեն այս հարցին անդրադառնալու, ինչպես նաև՝ դատախազությունը և նախաքննություն իրականացնող մարմինները։

Ավելի վաղ հայտնել էինք, որ ՀՀ երկրորդ նախագահ Ռոբերտ Քոչարյանի պաշտպանական թիմը միջնորդություն է ներկայացրել՝ խափանման միջոց կալանավորումը վերացնելու մասին, իսկ մեղադրող կողմը՝ Երևան քաղաքի դատախազ Գևորգ Բաղդասարյանը, ինչպես նաև՝ տուժող կողմը առարկեցին դրա դեմ։

Հիշեցնենք, որ Երկրորդ նախագահի խափանման միջոցի վերաբերյալ որոշումը կհրապարակվի սեպտեմբերի 17-ին` ժ. 13:00-ին։

Հեղինակ` Իզաբել Սահակյան