Փաստ ինֆո

Ներդրողներին սահմանի վրա բացատրում են, որ վերադառնան իրենց գործերին, քանի որ շուկայում կան համապատասխան խաղացողներ։ Նմանատիպ հայտարարություն էր արել ԱԺ «Բարգավաճ Հայաստան» խմբակցության պատգամավոր Սերգեյ Բագրատյանը սեպտեմբերի 10-ի ԱԺ նիստում։ «Փաստինֆո»-ն զրուցեց պատգամավորի հետ՝ պարզելու քայլեր պետք է ձեռնարկվեն խնդիրը լուծելու համար։

-    ԱԺ հայտարարությունների ժամին ասացիք, որ սահմանին ներդրողներին հետ են ուղարկում՝ ասելով շուկայում կան խոշոր խաղացողներ։ Կմանրամասնեք, թե հատկապես, որ ոլորտներում են նոր ներկրողները հանդիպել այդ խոչընդոտներին։

-    Իմ խոսքում նշեցի, որ քաղաքական հեղափոխությունը, փոփոխությունները պետք է հանգեցնեն  նաև տնտեսության փոփոխության և վերակազմավորման։ Դա իրականացնելու համար բավականին կոշտ միջոցառումներ պետք է ձեռնարկել։ Մասնավորապես կադրային այն  բազայի հետ, որ նախկին ռեժիմից մնացել  և ինչ-որ չափով հին իներցիայով խանգարում է նոր խաղացողներին։ Վերջիններս ցանկանում են մտնել շուկա և այդ երիտասարդ ակտիվիստները տնտեսության մեջ կարող են փոփոխություն իրականացնել, սակայն , ցավոք,հաճախ հանդիպում են արգելքների։ Ես նշեցի, որ այդ արգելքները հենց սահմանի վրա են հանդիպում։ Նախկին կադրերից բացատրում են ներկրող երիտասարդին, որ ճիշտ կլինի՝ չհավատաք փոփոխություններին և վերադառնաք ձեր գործերին։ Այստեղ այդ ոլորտը կայացած է և դուք անելիք չունեք։ Տարբեր մեթոդներով փորձում են դժվարություններ ստեղծել, որպեսզի նոր ներկրողներ, խաղացողներ ի հայտ չգան։

Նմանատիպ կարծրատիպ կա նաև արտադրության մեջ։ Արտադրող ընկերությունները նույնպես լոբբինգ են անում և փորձում են զսպել նոր խաղացողների առաջ գալը։ Սա տարածված մեթոդ է աշխարհում։ Մայքրոսոֆթ ընկերությունը, ձգտելով մենաշնորհի, հասավ այն կետին, որ 2000թ.-ին ԱՄՆ կառավարությունը ստիպված մտավ դատարան և պահանջեց տրոհել ընկերությունը երկու մասի, որպեսզի գերիշխող դեր չունենա շուկայում։ Այսինքն՝ սա ընդունված պրակտիկա է, որ կառավարությունն իր լծակներով կարգավորում է շուկան։ Թվում է՝ ազատականացման դեպքում բավական է հովանավորչությունը դադարեցնել։ Ներկա իշխանությունը չի հովանավորում խոշոր խաղացողներին, բայց դա բավարար չէ և պետք է ավելի կոշտ մեթոդների դիմել։

Օրինակ քվոտավորել ապրանքների ներկրման քանակը։ Պայմանական ասած, եթե որևէ ապրանքային շուկայում որևէ ներկրող 80-90 տոկոս գերիշխող դիրք ունի, պետք է այդ շուկայում թույլ չտալ , որ նա 30 տոկոսից ավել ապրանք ներկրի։ Սրանով, իսկ հնարավորություն տալ, որ նոր խաղացողներ ի հայտ գան շուկայում։ Կառավարությունը պետք է օգնի գերիշխող դիրքի հաղթահարմանը։ Որովհետև գերիշխող դիրք ունեցողներն անընդհատ պայքարում են՝ ավելի մեծացնելով իրենց ազդեցությունը։ Այսկերպ  խանգարում են  մրցակցությանը և գների իջեցմանը։

-   Կոշտ միջոցների դիմել ասելով կարո՞ղ ենք հասկանալ այն, որ մաքսատանը պետք է կադրային փոփոխություններ իրականացնել։

-   Այո, պետք է մրցույթ կազմակերպել և հնարավորինս նոր կադրերով համալրել մաքսային և հարկային մարմինները։ Այսինքն` այն մարմինները, որոնք կարող են ազդել տնտեսական գործընթացների վրա, պետք է որոշակի ինքնամաքրման տանել, որպեսզի նոր աշխատակիցները հին կապեր չունենան։  Պատկերացրեք՝ տարիներ շարունակ այդ նույն աշխատակիցներն աշխատել են խոշոր ընկերությունների հետ փոխհամաձայնությամբ, որոշակի խաղի կանոններով և այսօր նրանք չեն հրաժարվելու այդ խաղի կանոններից, իսկ այդ կապերի իսկությունը բացահայտելն էլ դժվար է։

-   Շա՞տ են այն ներդրողները, որոնք բախվել են այդ խնդրին և դիմել են Ձեզ։

-  Քանակական իմաստով ոչ, բայց որակային իմաստով այո։ Որովհետև այդ բողոքող երիտասարդները հիմնականում փոքր ծավալով են սկսում, որպեսզի մեծացնեն։ Ցավոք,  այդ փոքր ծավալը բնի մեջ խեղդելու քաղաքականություն է վարվում։

-    Հարցը բարձրացրեցիք խորհրդարանական ամբիոնից, գործընկերներն արձագանքե՞լ են արդեն։ Պատրաստվու՞մ եք հանդես գալ օրենսդրական նախաձեռնությամբ և քննարկել համապատասխան հանձնաժողովներում։

-   Գործընկերներս և՛ ընդդիմությունից, և՛ իշխանությունից համակարծիք են ինձ հետ։ Պատրաստվում ենք մոտ ժամանակներս տնտեսական հարցերի մշտական հանձնաժողով ներկայացնել նոր օրինագծեր, որոնք կօգնեն կառավարությանը՝ զսպելու խոշոր կառույցների գիշատիչ քաղաքականությունը։

Մանրամասները՝ տեսանյութում

Հեղինակ` Հասմիկ Կոշկարյան