Փաստ ինֆո

«Սեքյուրիթի դրիմ» ընկերության նախկին աշխատակիցներ Միքայել Պողոսյանի և Սիրակ Գրիգորյանի ներկայացրած հաղորդման հիման վրա հարուցվել է քրեական գործ։

Այս մասին «Փաստինֆո»-ն տեղեկանում է «Սեքյուրիթի դրիմ»-ի նախկին աշխատակից Միքայել Պողոսյանից։ Վերջինս տեղեկացնում է, որ կեղծ փաստաթղթեր կազմելու վերաբերյալ հաղորդում է ներկայացրել Ոստիկանության կազմակերպված հանցավորության դեմ պայքարի գլխավոր վարչություն։ «Ճանապարհային երթևեկության խախտումների վարչության պետ Արսեն Ղազարյանը տնօրենի` Արթուր Պողոսյանի հետ նախնական համաձայնությամբ կեղծ զեկուցագիր է գրել, որ 2019թ.-ի մարտի 1-ին ամբողջ օրն աշխատանքի չեմ ներկայացել»,-ասաց Միքայել Պողոսյանը` ավելացնելով, որ ձեռք են բերվել բավարար ապացույցներ և հարուցվել է քրեական գործ, որը գտնվում է ՀՀ քննչական կոմիտեի վարույթում։

Նշենք, որ քրեական գործը հարուցվել է մի խումբ անձանց կողմից նախնական համաձայնությամբ փաստաթղթերի կեղծելու դեպքի առէիվ` ՀՀ ՔՕ 325-րդ հոդվածի 2-րդ մասով։ Հիշեցնենք, որ մարտի 1-ին «Սեքյուրիթի դրիմ» ընկերության աշխատակիցները բողոքի ակցիա էին իրականացրել, որից օրեր անց` մարտի 5-ին, արգելափակվել են աշխատակիցների էլեկտրոնային անցագրերը և վերջիններս աշխատակիցների խոսքով անհիմն հեռացվել են աշխատանքից։

Լուսանկարում՝ Արթուր Պողոսյանը

Հեղինակ` Հասմիկ Կոշկարյան