Փաստ ինֆո

ՀՀ վերաքննիչ քաղաքացիական դատարանը, դատավոր Նաիրա Մարգարյանի նախագահությամբ, դատավորներ Անի Մխիթարյանի եւ Արսեն Մկրտչյանի մասնակցությամբ, սեպտեմբերի 9-ի որոշմամբ վարույթ չի ընդունել Ռոբերտ Քոչարյանն ընդդեմ Նիկոլ Փաշինյանի գործով Քոչարյանի ներկայացուցիչ Հայկ Ալումյանի կողմից ներկայացված բողոքը։ Այս մասին «Փաստինֆո»-ն տեղեկացավ «Դատալեքս» դատական-տեղեկատվական համակարգից։

Հիշեցնենք, որ օգոստոսի 21-ին Քոչարյանի ներկայացուցիչ Հայկ Ալումյանը մեզ հետ զրույցում նշել էր, որ բողոքարկել են Քոչարյանից որպես դատական ծախսի գումար հօգուտ Փաշինյանի 200 հազար դրամ բռնագանձելու վերաբերյալ որոշումը։ Նա դա պատճառաբանել էր՝ ասելով, որ նմանատիպ այլ գործերով դատական ծախսերը, մասնավորապես փաստաբանի վճարը, սովորաբար գանձվում է 100 հազարի չափով։

Ռոբերտ Քոչարյանը 2018 թվականի սեպտեմբերի 17-ին քաղաքացիական հայց էր ներկայացրել ընդդեմ Նիկոլ Փաշինյանի՝ հրապարակայնորեն արտահայտված զրպարտությունից պատիվը և արժանապատվությունը պաշտպանելու եւ հրապարակայնորեն ներողություն խնդրելուն պարտավորեցնելու պահանջով։ Առաջին դատական նիստին՝ հունիսի 12-ին, Հայկ Ալումյանը դատարանում ասել էր, որ եթե Նիկոլ Փաշինյանի ներկայացուցիչ Գեւորգ Գյոզալյանը հայտարարի, որ Փաշինյանը նկատի չի ունեցել Քոչարյանին, իրենք պատրաստ են հրաժարվել հայցից: Հաջորդ օրը՝ լրագրողների հետ զրույցում, նա նշել էր, որ հայցվոր կողմը հայցից հրաժարվելու է, քանի որ Փաշինյանի ներկայացուցիչ Գյոզալյանը հայտարարել է, որ վարչապետը նկատի է ունեցել Սահմանադրական նորմը և ոչ թե կոնկրետ անձի: Հունիսի 24-ին Քոչարյանն ընդդեմ Փաշինյանի գործը կարճվել էր, եւ դատարանը պարտավորեցրել էր հայցվոր կողմից որպես դատական ծախս բռնագանձել 200 հազար ՀՀ դրամ: Նշենք, որ պատասխանող կողմը պահանջել էր 650 հազար դրամ:

«Դատալեքս» դատական տեղեկատվական համակարգից «Փաստինֆո»-ն տեղեկացավ, որ հունիսի 24-ի որոշման դեմ բերված բողոքի ընդունումը մերժվել է բողոքարկման դատավարական ժամկետները բաց թողնելու հիմքով։

Ըստ դատական-տեղեկատվական համակարգի՝ ներկայացված վերաքննիչ բողոքում բողոքաբերի ներկայացուցիչը միջնորդել է հարգելի համարել վերաքննիչ բողոք բերելու ժամկետը բաց թողնելու պատճառը և վերականգնել այն՝ պատճառաբանելով, որ դատարանի՝ հունիսի 24-ի որոշումը ստացել է հուլիսի 1-ին։

Դատարանն ընդգծել է, որ ՀՀ քաղաքացիական դատավարության օրենսգրքի 362-րդ հոդվածի 1-ին մասի համաձայն՝ վճռի, ինչպես նաև գործի վարույթը կարճելու մասին որոշման դեմ վերաքննիչ բողոք կարող է բերվել այն հրապարակվելու օրվանից մեկամսյա ժամկետում՝ միաժամանակ նշելով, որ Քաղաքացիական դատավարության օրենսգրքի 17-րդ հոդվածի 7-րդ մասի համաձայն՝ դատարանի` եզրափակիչ, իսկ սույն օրենսգրքով կամ Բարձրագույն դատական խորհրդի որոշմամբ նախատեսված դեպքերում նաև այլ դատական ակտերը հրապարակվում են դատական իշխանության պաշտոնական կայքի միջոցով:

Վերաքննիչ դատարանն արձանագրել է, որ տվյալ պարագայում դատարանի հունիսի 24-ի որոշումը դատական իշխանության պաշտոնական կայքում հրապարակվել է հենց հունիսի 24-ին, այսինքն՝ որոշումը հայցվոր կողմին հասանելի է դարձել դատական ակտի հրապարակման օրը, այնինչ՝ վերաքննիչ բողոքը ներկայացվել է օգոստոսի 1-ին, այսինքն՝ բողոքարկման մեկամսյա ժամկետը լրանալուց հետո: Բացի այդ, Վերաքննիչ դատարանը հարկ է համարել ընդգծել, որ բացի հայտարարված օրը դատական ակտը դատական իշխանության պաշտոնական կայքում հրապարակվելու հանգամանքից, դատական ակտի օրինակը հունիսի 24-ին՝ դատական ակտի հրապարակման օրը, ուղարկվել է Բողոքաբերի ներկայացուցչին։

Հիմք ընդունելով վերոգրյալը և հաշվի առնելով այն հանգամանքը, որ չեն պահպանվել վերաքննիչ բողոք բերելու համար սահմանված դատավարական ժամկետները՝ Դատարանը որոշել է մերժել Ռոբերտ Քոչարյանի ներկայացուցչի միջնորդությունը` վերաքննիչ բողոք բերելու համար օրենքով սահմանված ժամկետը բաց թողնելու պատճառները հարգելի համարելու վերաբերյալ։ Միաժամանակ մերժվել է հիշյալ քաղաքացիական գործով ՀՀ Երևան քաղաքի ընդհանուր իրավասության դատարանի հունիսի 24-ի որոշման դեմ Ռոբերտ Քոչարյանի անունից բերված վերաքննիչ բողոքի ընդունումը։

Նշենք, որ սույն որոշումը կարող է բողոքարկվել վճռաբեկության կարգով` հրապարակման պահից տասնհինգօրյա ժամկետում։

Հեղինակ` Միլենա Խաչիկյան