Փաստ ինֆո

ՀՀ վերաքննիչ քրեական դատարանը՝ դատավոր Ռուզաննա Բարսեղյանի նախագահությամբ, մասամբ բեկանել է «Լիա» գեղեցկության սրահում տեղի ունեցած սպանության գործով առաջին ատյանի դատարանի դատավճիռը ու արդարացված քրեական հեղինակություն համարվող Նորատուսցի Ալիկին՝ Ալիկ Բանդուրյանին դատապարտեց ազատազրկման, բայց կիրառեց համաներում։

Հիշեցնենք, որ 2016 թ. նոյեմբերի 13-ին Չարբախում գործող «Լիա» գեղեցկության սրահի նկուղային հարկում կրակոցներ են հնչել, որի հետեւանքով 25-ամյա Գեւորգ Ավետիսյանը տեղում մահացել է, իսկ հրազենային վիրավորում ստացած 35-ամյա Արամ Պետրոսյանն ու 38-ամյա Մուշեղ Մուշեղյանը տեղափոխվել էին «Սուրբ Աստվածամայր» բժշկական կենտրոն, որտեղ եւ Մուշեղ Մուշեղյանը մահացել է: Քրեական գործով նախաքննական մարմինը Ալիկ Բանդուրյանին մեղադրանք էր առաջադրել ՀՀ քրեական օրենսգրքի 38-112 -րդ հոդվածի 2-րդ մասի 6-րդ կետով (մի խումբ անձանց կողմից դիտավորյալ առողջությանը ծանր վնաս պատճառելուն դրդելը), իսկ ՉարբախցիԳեղամ մականունով հայտնի Պետրոս Իսրայելյանին՝ ՀՀ ՔՕ 104-րդ հոդվածի 2-րդ մասի 7-րդ կետով (սպանություն, որը կատարվել է մի խումբ անձանց կողմից)։

Առաջին ատյանի դատարանը՝ դատավոր Նելլի Բաղդասարյանի նախագահությամբ, 2018 թվականի դեկտեմբերի 18-ին, ամբաստանյալ Ալիկ Բանդուրյանին՝ Նորատուսցի Ալիկին, արդարացրեց և ազատ արձակեց դատական նիստերի դահլիճից։ Չարբախցի Գեղամ մականունով հայտնի Պետրոս Իսրայելյանը մեղավոր ճանաչվեց ՀՀ ՔՕ 113-րդ հոդվածով ու դատապարտվեց 4 տարվա ազատազրկման եւ համաներումով ազատվեց: Բդո մականունով հայտնի Արմեն Գասպարյանը նույնպես արդարացվեց:

Առաջին ատյանի դատավճռի դեմ վերաքննիչ բողոք էր ներկայացրել դատախազը եւ Պետրոս Իսրայելյանի փաստաբանը։ Վերաքննիչ դատարանը որոշեց մերժել Չարբախցի Գեղամի պաշտպան Միհրան Պողոսյանի վերաքննիչ բողոքը, իսկ դատախազի վերաքննիչ բողոքը մասնակի բավարարեց։ Բանդուրյանին մեղավոր ճանաչեց դիտավորությամբ առողջությանը միջին վնաս պատճառելուն դրդելու համար և դատապարտեց 4 տարվա ազատազրկման. պատժին հաշվակցեց կալանքի տակ գտնվելու ժամկետը և նրա նկատմամբ վերջնական պատիժ նշանակեց 1 տարի 11 ամիս ժամկետով ազատազրկումը, սակայն համաներման հիմքով նրան ազատեց պատժի կրումից։

Աղբյուր` Փաստինֆո