Փաստ ինֆո

Շահագործման լիցենզիա ունեցող բոլոր 27 մետաղական հանքերում պետք է ստուգումներ իրականացվեն։ Այս մասին  ԱԺ-ում  հայտարարել է Շրջակա միջավայրի նախարար Էրիկ Գրիգորյանը՝ նշելով, որ նման հանձնարարական է տրվել դեռ անցած տարի՝ վարչապետի կողմից։  Հանքերի մի մասում արդեն իրականացվել են ստուգումները, կամ ընթացքի մեջ են։

«Հանձնարարականը ենթադրում է, որ ստուգումներ պետք է իրականացվեն նաեւ Կապանի հանքում»,- նշեց Էրիկ Գրիգորյանը։

Հարցը վերաբերում է  Կապանի և Քաջարանի հանքերից առաջացող թափոններին, որոնք անձրևներից հետո  լցվում են Ողջի գետը՝ փոխելով գետի գույնը։

«Կավարտի գործող հանքը, որը դադարեցրել է աշխատանքը և հրաժարման փաստաթուղթ է ստացել։ Հրաժարման փաստաթղթի մեջ չեն ամրագրվել ռեկուլտիվացիայի համար պահանջվող միջոցառումները և, ըստ էության, այդ տնտեսվարողը չի ստանձնել այն պարտավորությունները, որոնք որ  պետք է ստանձներ և այդ չռեկուլտիվացված տարածքներից՝ տեղումների և տարբեր այլ բնակլիմայական գործընթացի հետևանքով ,փաստացի, այդտեղ ձևավորված և աղտոտող նյութերը և այլ տարրերը հոսում են Ողջի գետ»,- նշեց Գրիգորյանը։

Իսկ Քաջարանի հետ կապված աղտոտումների վերաբերյալ,Էրիկ Գրիգորյանը նշեց, որ ստուգումներ Քաջարանում իրականացվել են։ Նա նշեց, որ փոխվել է նախագիծը մշակվել է ջրային ռեսուրսների կառավարման մասով աղտոտման և այդ փոխհատուցման մեխանիզմից կանխարգելման մեխանիզմի անցնելու համար։

«Եթե, օրինակ, համազարկային աղտոտում էր լինում և հնարավոր էր վճարել 500.000 դրամ տուգանք և անցնել, ապա այսուհետև դա հնարավոր չի լինելու անել, որովհետև կանխարգելման մեխանիզմը պետք է դրված լինի։ Ինչպես նաև Զանգեզուրի հետ կապված խնդիր կա վերևի դիտակետի տվյալների և ներքևի դիտակետի տվյալների, որովհետև անհասկանալի է։ Այնտեղ իրավիճակ կա, որ կարծես թե վերևն ավելի կեղտոտ էր ջուրը՝ մինչև հասնելը, քան ներքևը, երբ որ պոչամբարից հետո բաց են թողնում։»,- հայտարարեց Էրիկ Գրիգորյանը։

Նրա հավաստմամբ՝ գետի գունափոխման պատճառը կոնկրետ Ողջ գետի Կավարտ վտակի հետ եկող թափոններն են աղտոտում գետը։

Աղբյուր` Փաստինֆո