Փաստ ինֆո

«Նիկոլ Փաշինյանը գտնվում աննախանձելի վիճակում։ Նա ռեալ հասկացել է, որ, եթե նախկինում հեգնանքով էր վերաբերվում Ամուլսարի խնդրին, հիմա այն իր համար կենսական սար է դարձել։ Նա առաջին անգամ հասկացել է, որ իր համար Ամուլսարը քաղաքական գոյության խնդիր է»,- «Փաստինֆո»-ի հետ զրույցում նման կարծիք հայտնեց քաղաքագետ Երվանդ Բոզոյանը՝ անդրադառնալով Ամուլսարի շուրջ ստեղծված իրավիճակին եւ այն բարդ ընտրությանը,որի առջեւ այսօր կանգնած է վարչապետ Փաշինյանը։

Քաղաքագետի կարծիքով, շախմատային լեզվով ասած՝ այսօր Փաշինյանն ու նրա թիմը հայտնվել են ցուգցվանգի մեջ է. «Հանքը բացել չեն կարող, փակել՝ չեն կարող։ Նա կանգնած է հանրության մեջ առանց հենարանի մնալու եւ իշխանությունը կորցնելու ռիսկի առջեւ։ Ցանկացած քայլից նա կորուստներով է դուրս գալու։ Սա ողբերգական վիճակ է իր համար»։

Մի կողմից, ըստ քաղաքագետի, Փաշինյանի հռչակած հեղափոխության գլխավոր պարադիգմաներից մեկը բնապահպանական խնդիրներն էին եւ որպես սիմվոլ՝ հենց Ամուլսարը, մյուս կողմից, Փաշինյանը հասկանում է, որ այս ծրագրի տապալումով հնարավոր ներդրումների վերջին հույսերը կմարեն։ «Եթե ընդամենը մեկ տարի առաջ Փաշինյանը հայտարարում էր, որ Հայաստանի տնտեսությունը պետք է հիմնվի բարձր տեխնոլոգիաների վրա, իսկ հանքարդյունաբերությունից կամաց-կամաց պետք է հրաժարվել, մեկ հետո նա հասկացավ, որ ռուսների ասած՝ «мечтать не вредно»։ Այն պայմաններում, երբ չկան խոստացված ներդրումները, չկա տնտեսական հեղափոխությունը, որի մասին նա խոսում էր, ցանկացած ներդրում, ցանկացած կոպեկ արժեքավոր է դառնում եւ հանքարդյունաբերությունն ավելի արժեքավոր է դառնում, քան նախկինում էր, որովհետեւ նախկինում, կոռուպցիոն ռիսկերով հանդերձ, գոնե ներդրումներ կային»։

Երվանդ Բոզոյանի խոսքով, «Լիդիան»-ի բաժնետոմսերը արդեն 4 անգամ անկում են գրանցել։ Միջազգային բաժնետերերը իրենց շահերն են պաշտպանելու եւ եթե Հայաստանը միջազգային կորպորացիայի հետ դատական գործընթացի մեջ մտնի , նույնիսկ արբիտրաժի տուգանքները մի կողմ դնելով, գործընթացը մեծ հարված է հասցնելու երկրի տնտեսական իմիջին։

Մյուս կողմից, բնապահպանները, ակտիվիստները, «Քաղաքացու որոշում»-ը, «Սասնա ծռեր»-ը եւ ընդհանուր առմամբ, այն միջավայրը, որը Փաշինյանի հենարանն էր ու փաստացի աջակցել է նրան հեղափոխության ժամանակ, Ամուլսարի փակման կողմնակից է։ «Եթե ինքը հանքը բացի, դեմ կգնա հեղափոխական արժեքներին, նա կկորցնի հանրության հեղափոխական հատվածի վստահությունը, որովհետեւ հանրության պահպանողական հատվածը, որոնց Փաշինյանը հայտարարել է սեւեր, արդեն իր թշնամին է» ։

Ըստ քաղաքագետի, Ամուլսարը կարագացնի հեղափոխական իշխանության գահավիժման պրոցեսը, ինչն էլ օբյեկտիվորեն կառաջացնի իշխանափոխության խնդիր։ Առնվազն հաջորդ տարի քաղաքագետը Հայաստանում արտահերթ ընտրություններ է կանխատեսում։

Միեւնույն ժամանակ, Բոզոյանը շեշտում է՝ Փաշինյանն այս վիճակում է օբյեկտիվ պատճառներով.«Երբ հեղափոխական իշխանությունն է գալիս, պարզվում է, իշխանության մեջ որ հեղափոխական պոպուլիզմը խորթ է, նա տեսնում է խնդիրները եւ ստիպված պետք է դառնա հակահեղափոխական ։ Առաջին անգամ Փաշինյանը Ամուլսարի հարցով դառնում է հակահեղափոխական»,-եզրափակեց Երվանդ Բոզոյանը։

Աղբյուր` Փաստինֆո