Փաստ ինֆո

«Բնապահպանական ճակատ» նախաձեռնության անդամներն այս պահին Ազգային ժողովի այգում են և պատրաստվում են քայլերթի։ Ակցիայի մասնակիցներին սկզբում չէր հաջողվում մտնել այգի՝ ոստիկանական պատնեշի պատճառով, սակայն քիչ առաջ նրանց մոտեցավ ԱԺ նախագահ Արարատ Միրզոյանն ու նշեց, որ եկել է տեխնիկական մի շարք հարցեր քննարկելու։ ԱԺ նախագահը հրաժարվեց պատասխանել Ամուլսարի հանքի շահագործման վերաբերյալ հարցերին՝ նշելով, որ չի պատրաստվում բովանդակային քննարկման մեջ մտնել։

Դիտարկամանը, թե խուսափում է հարցերին պատասխանելուց՝ Միրզոյանը պատասխանեց. «Մասնակի եք ճիշտ ասում», ապա ավելացրեց, որ ինքը հետևում է Ամուլսարի հարցով զարգացումներին ու մտահոգություններին։

«Բազմաթիվ մտահոգությունների մի մասը, որոշակի հետազոտություն անելով, համարում եմ անտեղի, մի մասն էլ կիսում եմ»,-ասաց Միրզոյանը։

Վերադառնալով ԱԺ այգի մտնելու արգելիքի հարցին՝ Միրզոյանն ասաց. «Գոյություն ունի իրավական ակտ, որտեղ ասվում է, որ մարդիկ կարող են ակցիաներ անել միայն ԱԺ նախագահի գիտությամբ, գլխավոր քարտուղարի և պահպանության ծառայության պետի հրահանգով»։

Դիտարկմանը, որ Ամուլսարի հետ կապված հայտարարություններով ոտնահարվում է հեղափոխության գաղափարը, Միրզոյանը պատասխանեց ասելով, որ չի կիսում այդ կարծիքը. «Մենք ուրեմն տարբեր կերպ ենք ընկալել հեղափոխության գաղափարները»։

Իսկ ցուցարարի պնդմանը, որ Փաշինյանն ասել է՝ մեծամասնությունն ինչպես որոշի՝ այդպես է լինելու, Ջերմուկի բնակիչներն էլ դեմ են Ամուլսարի հանքի շահագործմանը, ԱԺ նախագահը պատասխանեց. «Կարծում եմ չարժի մտնել տափակ քննարկման մեջ, թե որն է մեծ մասի ուզածը, դա չափելի՞ է, թե՞ ոչ։ Եթե ես այդպիսի քննարկում սկսեի՝ ի պատասխան ասվածի, ապա դա կլիներ տափակ քննարկում։ Այց որակումը ոչ թե Ձեզ կամ Ձեր ասածին էր վերաբերում, այլ նրան՝ ինչպիսի դիսկուրս կարող էր ձևավորվել»։

ԱԺ նախագահի հեռանալուց հետո, ոստիկանները բացեցին պատնեշն ու ցուցարարները մտան ԱԺ այգի։
Այս պահին ցուցարարները սկսել են երթը։

Հեղինակ` Սոնա Գեւորգյան