Փաստ ինֆո

«Սանիթեքը» պարբերաբար չի տալիս աշխատակիցների աշխատավարձերը. Մարությանը կարծում է՝«Սանիթեքի» աշխատակիցների ակցիան ուղղորդված էր։

«Իմ պաշտոնավարման ընթացքում մենք պարբերաբար ՄԻՊ-ի գրասենյակից նամակներ էինք ստանում, որտեղ նշված էր, որ «Սանիթեքում» չէին տալիս աշխատակիցների աշխատավարձը, չէին անում վերջնահաշվարկ և այլն։ «Սանիթեքում» սա պարբերաբար բնույթ է կրում և անընդհատ այս խնդիրները կան»,-այսօր լրագրողների հետ ճեպազրույցում ասել է Երևանի քաղաքապետ Հայկ Մարությանը։

Հիշեցնենք, որ «Սանիթեք» ընկերության աշխատակիցներն այսօր բողոքի ակցիա են իրականացրել Երևանի քաղաքապետարանի դիմաց։

Ակցիայի մասնակիցները նշել են, որ քաղաքապետարանը «Սանիթեքին» գումար չի փոխանցել, այդ պատճառով «Սանիթեքն» իրենց աշխատավարձ չի տվել։ Նրանք նաև դժգոհում էին գործազրկությունից, քանի որ արդեն մի քանի օր է, ինչ «Սանիթեքը» գործունեություն չի ծավալում։

Մարությանն այս ակցիան «Սանիթեքի» կողմից ուղղորդված է համարել և նշել, որ ընկերությունն իր խնդիրները փորձում է բարդել քաղաքապետարանի վրա։

«Մեր աշխատակիցները «Սանիթեքի» աշխատողներին հարցրել են, թե երբ են ստանում աշխատավարձը, նրանք էլ ասել են ամսի 15-ից հետո։ Չմոռանանք, որ այսօր դեռ սեպտեմբերի 10-ն է և ամսի 15-ն էլ դեռ չի անցել»,-ասաց քաղաքապետը։

Մարությանն ընդգծեց, որ Երևանի քաղաքապետարանը «Սանիթեքին» մշտապես հորդորել է վճարել գումարները, նաև փորձել են իրավաբանական օգնություն ցուցաբերել աշխատակիցներին։

«Այս անգամ նույնպես, մենք միայնակ չենք թողնի աշխատակիցներին և իրավաբանական օգնություն կցուցաբերենք, ինչով կարող ենք կօգնենք, բայց ես ուզում եմ հայտնել, որ այն ինչ փորձում է ասել «Սանիթեքը», այդպիսի բան կարծում եմ չկա, քանի որ ընդհանուր փոխանցվող գումարի 9%-ի չափով են եղել տուգանքները»,-շեշտեց քաղաքապետը։

Խոսելով աշխատակիցների աշխատանքի խնդրի մասին, Մարությանն ասաց. «Մեր ամբողջ աշխատակազմը, նաև սանմաքրման հիմնարկը, պարբերաբար հայտարարում ենք, որ մեզ պետք են աշխատակիցներ, կարող են մարդիկ գալ, անցնել հարցազրույցը, անցնել աշխատանքի, առավել ևս, որ մենք հիմա ակտիվ համալրում ենք մեր կազմը»։

Հեղինակ` Սոնա Գեւորգյան