Փաստ ինֆո

Oգոստոսի 24-ին «Մալաթիա մոլ»-ում հրդեհի բռնկման դեպքի առթիվ Երևան քաղաքի դատախազության տարածքային վարչությունում հարուցվել է քրեական գործ։ Այս մասին «Փաստինֆո»-ն տեղեկացավ Դատախազության հանրային կապերի բաժնի պետ Արևիկ Խաչատրյանից։

Վերջինիս փոխանցմամբ` գործը հարուցվել է ՀՀ ՔՕ-ի 185-րդ հոդվածի 3-րդ մասի 1-ին կետով, այն է` ուրիշի գույքը դիտավորությամբ ոչնչացնելը կամ վնասելը, որը պատճառել է առանձնապես խոշոր չափերով վնաս։

Ավելի վաղ Արտակարգ իրավիճակների նախարարի մամուլի քարտուղար Էդմոն Զարգարյանը մեզ հետ զրույցում նշել էր, որ ԱԻՆ հակահրդեհային վարչությունում նյութեր են նախապատրաստվում Դատախազություն ուղարկվելու համար։

Հիշեցնենք, որ Օգոստոսի 24-ին՝ ժամը 15:47-ին, «911» ծառայությանն ահազանգ էր ստացվել, որ Երևան քաղաքի Սեբաստիա փողոցում գտնվող «Մալաթիա մոլ»-ի շենքում հրդեհ է բռնկվել։ Այն հաջողվել էր մարել միայն հաջորդ օրը՝ լուսադեմին։ Ընդհանուր առմամբ` հրդեհաշիջման աշխատանքներին ներգրավվել էր 19 մարտական հաշվարկ։

ԱԻՆ-ի հայտնած տվյալների համաձայն՝ «Մալաթիա մոլ»-ում բռնկված հրդեհի հետեւանքով այրվել է շուրջ 30.000 քմ տարածք` ոչնչացնելով փայտամշակման հաստոցներ, կահույք, տեխնիկա. «Հրդեհի հետևանքով «Վեգա-Ուորլդ» ՍՊԸ-ի շենքի նկուղային հարկում (մոտ 8000 քմ) այրվել են փայտամշակման հաստոցներ և լամինատ, 1-ին հարկում (մոտ 11.000 քմ)` լամինատ, կենցաղային տեխնիկա և կահույք, 2-րդ (մոտ 5000 քմ) և 5-րդ (մոտ 6000 քմ) հարկերում` կահույք»:

Առողջապահության նախարարի մամուլի խոսնակն էլ փոխանցել էր, որ հրդեհի հետեւանքով տուժել է տասը հոգի, ովքեր համապատասխան բուժօգնություն ստանալուց հետո դուրս են գրվել հիվանդանոցից։

Հեղինակ` Միլենա Խաչիկյան