Փաստ ինֆո

Ամուլսարի շահագործման հարցում ՀՀ վարչապետ Նիկոլ Փաշինյանն իր դիրքորոշումը չի փոխել։ Այդ մասին այսօր նա հայտարարել է ֆեյսբուքյան իր էջի միջոցով ուղիղ եթերի ժամանակ։

«Առնվազն այս պահի դրությամբ մենք չունենք Ամուլսարի հանքի շահագործումն արգելելու որևէ իրավական հիմնավորում, բայց հասկանալի է նաև, որ մենք չենք կարող հաշվի չառնել մեր հանրության շրջանում առկա անհանգստությունները»,-ասել է ՀՀ վարչապետը։
Նա ընդգծել է, որ մյուս կողմից պետք է հաշվի առնել Հայաստանի տնտեսական հանրության անհանգստությունը։

«Ինչպես գիտեք վերջերս «Մուդիս» ընկերությունը բարձրացրել է Հայաստանի վարկանիշը, ինչը նշանակում է, որ ՀՀ-ն և ՀՀ-ի մասնավոր բանկերը, կազմակերպությունները կարող են ֆինանսական միջոցներ ներգրավել ավելի էժան, քան երբ Հայաստանի վարկանիշն ավելի ցածր էր»,-նշել է Փաշինյանը։
Նրա խոսքով, Ամուլսարի շուրջ ստեղծված իրավիճակում Հայաստանն ունի որոշակի ազդակներ, որոնք վկայում են, որ եթե իրավիճակը ճշգրիտ չկառավարվի, ճշգրիտ և պետական մոտեցում չցուցաբերվի, ապա դա կարող է հանգեցնել Հայաստանի վարկանիշի վատթարացման, ինչի արդյունքում քաղաքացիները կզգան վարկերի, տոկոսների բարձրացում։

«Եթե ասում ենք՝ ենթադրենք ուղղակի Ամուլսարի հանքը թույլ չենք տալիս շահագործվի, ապա շատ պարզ հարց է ծագում, ինչու՞ , այո, իհարկե, բնապահպանական մտավախություններից ելնելով։ Ծագում է հաջորդ հարցը, եթե այդպես է ինչու՞ եք թույլ տալիս, որ Զանգեզուրի պղնձամոլիբդենային կոմբինատը շահագործվի, Թեղուտի հանքը շահագործվի, արդյո՞ք դրանք համապատասխանում են բոլոր միջազգային ստանդարտներին»,-հարցրել է վարչապետն ու նշել, որ այդ հարցում Հայաստանը միջազգայնորեն շատ լուրջ խնդիր կարող է ունենալ, եթե հանկարծ պարզվի, որ խտրական մոտեցում է ցուցաբերում։

Վարչապետն ընդգծել է, որ կարևոր է նաև հաշվի առնել Հայաստանի տնտեսության անվտանգության և արտաքին անվտանգության խնդիրները, որոնք նույնպես որոշակի կարևորություն ունեն այս հարցը քննարկելիս։

«Չեմ կարող այս թեմայի վերաբերյալ ավելի մանրամասն խոսել, չնայած կարծում եմ, որ եթե ձեզնից յուրաքանչյուրն ինքն իր վերլուծություններն անի, թերևս պարզ կլինի՝ ինչ նկատի ունեմ և ինչո՞ւ եմ անվտանգության հարցը հիշատակում այս համատեքստում»,-ասաց Փաշինյանը։
Ամփոփելով խոսքը, վարչապետն ասաց՝ Հայաստանը չի կարող անտեսել և արհամարհել առկա բնապահպանական ռիսկերը, և իր դիրքորոշումը նախկինի պես է՝ եթե հանքի շահագործումն անվտանգ է բնապահպանական և մյուս չափանիշներով, ապա հանքը կարող է շահագործվել, իսկ եթե ոչ, ապա չի կարող շահագործվել։

«Մենք ունենք մի իրավիճակ, որ դե յուրե այն մարմինը, որ պատասխանատու է այդ ամենի համար, ինքն ամենաբարձր մակարդակով ասում է, երաշխավորում է, մենք էլ ասում ենք ասում ենք՝ հասկանում եք չէ՞ եթե դա չերաշխավորվի հանքն անմիջապես կփակվի, նրանք էլ ասում են այո, իհարկե հասկանում ենք»,-նշել է ՀՀ վարչապետը։

Հեղինակ` Սոնա Գեւորգյան