Փաստ ինֆո

«Չեմ ցանկանում մասնագիտական մանրամասների մեջ մտնել, ոչ այն պատճառով, որ չեմ կարող տեսակետ հայտնել, այլ զուտ սկզբունքային մոտեցման պատճառով, քանի որ իմ համոզմամբ, նախ պետք է  լուծել Սահմանադրության ու սահմանադրականության խնդիրը»,-«Փաստինֆո»-ի հետ զրույցում ասաց Վարուժան Ավետիսյանը՝ անդրադառնալով ՀՀ երկրորդ նախագահ Ռոբերտ Քոչարյանի դիմումի հիման վրա ՍԴ-ի ՝ սեպտեմեբրի 4-ի որոշմանը։

Վարուժան Ավետիսյանի խոսքով` առաջին իսկ օրից անհրաժեշտ էր հեղափոխական մոտեցմամբ ու տրամաբանությամբ կտրուկ լուծել այդ խնդիրը. «Հիմա մի ճահիճ է առաջացել, որից լուծումը էլի այդպիսի քայլերով է հնարավոր, ուրիշ տարբերակ չկա։ Հնարավոր չէ հակապետական, հակաժողովրդական  համակարգի մեջ փորձել նրա օրենքներով հարցեր լուծել»։

Ըստ Ավետիսյանի, առնվազն ՍԴ անդամ Վահե Գրիգորյանի  առաջարկությամբ  համապատասխան սուբյեկտները, որոնք կարող էին ՍԴ դատավոր առաջադրել , պետք է դա անեին.«ՍԴ ապօրինի կազմը  պետք է ցրվեր, բայց հապաղում տեղի ունեցավ եւ ստեղծվեց այս վիճակը»։

Դիտարկմանը, արդյո՞ք մեղադրող կողմը  Քր.դատ . օրենսգրքի 35-րդ հոդվածի մասով չէր կարող կանխատեսել նման հանգուցալուծում, գուցե ոչ պատշաճ մասնագիտական պատրաստվածությո՞ւնն է ստեղծված իրավիճակի պատճառը, Վարուժան Ավետիսյանն արձագանքեց. «Մասնագետներ կան, բոլորն էլ  հասկանում են դա, խնդիրը դրանում չէ։ Դա մոտեցում է, որ պետք չէ համակարգին ձեռք տալ, մինչդեռ համակարգը պետք է վերակազմավորել ամբողջությամբ»։

Ըստ Ավետիսյանի ՍԴ որոշումը չպետք է կատարվի։

Հիշեցնենք, որ Բարձր դատարանը որոշել է  Հայաստանի Հանրապետության քրեական դատավարության օրենսգրքի 35-րդ հոդվածը` Սահմանադրության ուժով հատուկ պաշտպանությամբ օժտված պաշտոնատար անձանց գործառութային անձեռնմխելիությունը՝ քրեական գործի վարույթը կամ քրեական հետապնդումը բացառող հանգամանքների թվում չնախատեսելու մասով, ճանաչել Սահմանադրության 27-րդ հոդվածի 1-ին մասի 4-րդ կետին, 61-րդ հոդվածի 1-ին մասին, 63-րդ հոդվածի 1-ին մասին և 75-րդ հոդվածին հակասող և անվավեր: Իսկ  Հայաստանի Հանրապետության քրեական դատավարության օրենսգրքի 135-րդ հոդվածի 2-րդ մասը համապատասխանում է Սահմանադրությանը:

Աղբյուր` Փաստինֆո