Փաստ ինֆո

ՄԻԵԴ-ի և Վենետիկի հանձնաժողովի 300․1 հոդվածի վերաբերյալ կարծիքը ներկայացնելուց հետո, միևնույն է ՍԴ-ն ինքը պետք է գնահատական տա այդ հարցերին, անկախ նրանից Ռոբերտ Քոչարյանի նկատմամբ քրեական հետապնդումը դադարեցված է, թե ոչ։ Այս մասին մամուլի ասուլիսի ժամանակ ասաց ՀՀ երկրորդ նախագահ Ռոբերտ Քոչարյանի պաշտպան Հայկ Ալումյանը։

Վերջինս, պատասխանելով հարցին, արդյոք քրեական հետապնդումը և քրեական գործը կասեցվելու դեպքում նշանակություն կունենա ՄԻԵԴ-ի և Վենետիկի հանձնաժողովի 300․1 հոդվածին վերաբերող գնահատականը։ «Այն խնդիրը, որը դրված է Վենետիկի հանձնաժողովի և ՄԻԵԴ-ի առջև, երբ ստանա իր լուծումը, միևնույն է, ՍԴ-ն պետք է նիստ հրավիրի և ինքը այդ հարցերի գնահատականը տա»,-նշեց Հայկ Ալումյանը։

Հիշեցնենք, որ հուլիսի 18-ին ՍԴ-ն խորհրդատվական կարծիք ստանալու համար դիմել էր ՄԻԵԴ և Վենետիկի հանձնաժողով։ «Երևան քաղաքի ընդհանուր իրավասության դատարանի և Ռոբերտ Քոչարյանի դիմումների հիման վրա՝ Հայաստանի Հանրապետության քրեական օրենսգրքի 300.1-րդ հոդվածի՝ Սահմանադրությանը համապատասխանության հարցը որոշելու վերաբերյալ» գործերով խորհրդատվական կարծիք ստանալու նպատակով Մարդու իրավունքների եվրոպական դատարանին և Վենետիկյան հանձնաժողովին դիմելու և այդ կապակցությամբ հիշյալ գործերի վարույթները՝ մինչև պատասխանները ստանալը, «Սահմանադրական դատարանի մասին» սահմանադրական օրենքի 56-րդ հոդվածի առաջին մասի 5-րդ կետի հիմքով կասեցնելու վերաբերյալ»,- հայտնում են ՍԴ-ից:

Հայկ Ալումյանը նաև նշեց, որ այս պահի դրությամբ ներկայացրել են խափանման միջոցը վերացնելու և քրեական հետապնդումը դադարեցնելու վերաբերյալ միջնորդություններ։ ՀՀ երկրորդ նախագահի պաշտպանը չբացառեց նաև քրեական գործը կասեցնելու վերաբերյալ միջնորդություն ներկայացնելը․ «Առ այս պահը մենք կասեցման միջնորդություն չենք ներկայացրել, ինչը չի բացառում, որ դատարանն իր նախաձեռնությամբ կամ հետագայում հնարավոր է մեր միջնորդությամբ այդ հարցին անդրադառնա»,-ընդգծեց Հայկ Ալումյանը։

Հեղինակ` Հասմիկ Կոշկարյան