Փաստ ինֆո

«Հայաստանում ինչ տեսակի կուսակցություն ասես կա, սակայն մեծ տարբերություն դրանց մեջ չկա, դրա համար եմ ասում, որ սա հերթական բուտաֆոր, դեկորատիվ կուսակցությունն է, որովհետև Հայաստանի քաղաքական դաշտն առնվազն վերջին 30 տարվա ընթացքում բուտաֆոր ու դեկորատիվ թատրոն է եղել, որում կան բազմաթիվ դեկորացիաներ, դերասաններ»,-այսօր «Ադեկվադ» կուսակցության հիմնադիր համագումարի ժամանակ ասաց նորընտիր ղեկավար Արթուր Դանիելյանը։

Նրա խոսքով, այդ թատերաբեմը ստեղծվեց, երբ Հայաստանն իբր թե անկախացավ և իբր ընդունեց Սահմանադրություն։ «Այդ Սահմանադրությունն ավելի շուտ ներմուծվեց Հայաստան, բերվեց, ասվեց սա ընդունում եք, հետո ընդունում ենք Քաղաքացիական, Հարկային օրենսգիրքը և այլն, պետությունը ստանում է իր բաժին «գրանտները»։ Բայց այդ «գրանտները» ստանալու համար պետք է լինի թատերաբեմ , որտեղ կլինեն դերասաններ և նրանցից յուրաքանչյուրը պետք է իր դերը խաղա»,-ասաց Դանիելյանը։ Նա նշեց, որ ըստ իր կանխատեսումների հաջորդ հեղափոխությունը սկսելու է Հայաստանից կամ հայկական պետություններից . «Մարդկությունը, մարդկանց ոգին փրկվելու է մի պրոցեսի արդյունքում, որը ստեղծվելու է և սկսվելու է Հայաստանից։

Այդ առումով մենք պետք է շնորհակալ լինենք բոլոր այն մարդկանց, ովքեր մեկ տարի առաջ իրենց կարծիքով հեղափոխություն էին անում, առանց նրանց ջանքերի մենք այսօր չէինք ունենա այս բարենպաստ իրավիճակը»,-ասաց կուսակցության ղեկավարը։ Դանիելյանն ընդգծեց, որ «Ադեկվադը» որպես կուսակցություն հռչակելով իրենք «հանդիսատեսին» դիմում են ասելով ՝ «եկեք այս թատրոնից դուրս գանք»։

Հեղինակ` Սոնա Գեւորգյան