Փաստ ինֆո

Կառավարությունում նախօրեին կայացած Փաշինյան-Սեֆիլյան-Չուգասզյան հանդիպումից հետո, իշխանության ներսում հնարավոր է տարաձայնություններ առաջանան։ «Փաստինֆո»-ի հետ զրույցում նման կարծիք է արտահայտել քաղտեխնոլոգ Վիգեն Հակոբյանը։

«Եթե ամբողջական իշխանությունն ենք վերցնում՝ թե էմոցիոնալ, թե մարդկային, թե կորպորատիվ առումով, կարող են բավականին նեգատիվ տրամադրություններ ծագել ուժային կառույցներում, մասնավորապես՝ ոստիկանությունում եւ ԱԱԾ-ում։ Սա կարող է վտանգավոր լինել հենց այսօրվա վարչապետի համար»,-կարծիք է հայտնել քաղտեխնոլոգը։

Ըստ նրա, հասարակությունը, հասկանալի պատճառներով, եւս միանշանակ չի ընդունի այս հանդիպումը։
Հիշեցնենք, 2016 թվականի հուլիսին «Սասնա ծռեր» զինված խմբավորումը գրավել էր ոստիկանության պարեկապահակային գունդը։ «Սասնա ծռեր»-ի գործողությունների արդյունքում զոհվեցին ոստիկանության գնդապետ Արթուր Վանոյանը, ենթասպա Յուրի Տեփանոսյանը և ոստիկանության ավագ ենթասպա Գագիկ Մկրտչյանը։

ՊՊԾ գնդի գրավումից հետո «Սասնա ծռեր» զինված խմբավորումը պատանդ էր վերցրել փոխոստիկանապետ Վարդան Եղիազարյանին, գործող ոստիկանապետ՝ այն ժամանակ Երևանի ոստիկանապետի տեղակալ Վալերի Օսիպյանին և ևս վեց ոստիկանի, ինչպես նաեւ շտապօգնության 3 բուժաշխատողի։
Նախօրեին կառավարությունում վարչապետ Փաշինյանը հանդիպել է «Սասնա Ծռեր» կուսակցության ղեկավար անդամ Ժիրայր Սեֆիլյան և «Սասնա Ծռեր» կուսակցության քաղաքական խորհրդի անդամ Գարեգին Չուգասզյանի հետ։ Պաշտոնական հաղորդագրություն հանդիպման մասին չի տարածվել։

Այսօր հանդիպման մասին մանրամասներ է ներկայացրել Գարեգին Չուգասզյանը՝ նշելով, որ Նիկոլ Փաշինյանին ներկայացրել են այն մտահոգությունները, որոնք քաղաքական ուժն ունի ինքնիշխանության խնդիր, Արցախյան հիմնահարցի, բնապահպանական խնդիրների, դատաիրավական ռեֆորմների և հակահեղափոխական ռեւանշի վտանգի վերաբերյալ։

Անդրադառնալով այն հարցին, թե արժե՞ր արդյոք, որ երկրի վարչապետը հանդիպի մի քաղաքական ուժի ներկայացուցիչների հետ, որոնք զինված ապստամբություն են իրականացրել, Վիգեն Հակոբյանն ասաց. «Այստեղ տարօրինակ ոչինչ չկա, այն իմաստով, որ իշխանափոխությունից հետո գործող իշխանություն ընդառաջել է այդ ուժին՝ ազատելով նրանց բանտերից եւ առավելագույնս բարենպաստ ռեժիմ է ապահովել, այդ թվում նրանց համար, ովքեր մասնակցել են 2016 թվականի հուլիսյան գործողություններին, ավելին` միավորումը վերածվել է քաղաքական կազմակերպության, մասնակցել ընտրությունների, այլ հարց է, որ ստացել է 1.5 տոկոս ձայներ»։

Քաղտեխնոլոգը հիշեցրեց, որ նախկինում էլ Սասնա Ծռերի վերաբերյալ որեէ հայտարարություն Փաշինյանը չի արել։

Աղբյուր` Փաստինֆո