Փաստ ինֆո

Գ.Մելոյանը ողջունելի է համարում, որ ՀՀ արդարադատության նախարարությունն որոշակիորեն ականջալուր է մասնագիտական համայնքի նկատառումներին և չի հատում մասնագիտական ողջամտության սահմանները. կոնկրետ վերոնշյալ դրվագներով կարգավորումների լրամշակումը կարելի է արձանագրել որպես երկկողմանի կոնսենսուսի հաղթանակ:

«Ողջունելի է. մասնագիտական հանրության ձայնը դեռ լսելի է»,- «Փաստինֆո»-ի թղթակցին ասաց իրավաբան Գոհար Մելոյանը՝ անդրադառնալով «Դատական օրենսգիրք» եւ «Սահմանադրական դատարանի մասին» սահմանադրական օրենքներում փոփոխություններ ու լրացումներ կատարելու մասին օրինագծերում Արդարադատության նախարարության կատարած լրամշակումներին։

Ինչպես արդեն նշել ենք՝ ավել վաղ հանրային քննարկման ներկայացված օրենսդրական փաթեթում առկա էին մի շարք անթույլատրելի կարգավորումներ, որոնց մասին մասնագիտական համայնքը հայտնեց իր մտահոգությունները: ՀՀ արդարադատության նախարարությունը ներկայացրել է նախագծերի փաթեթի լրամշակված տարբերակը։ «Նշված նախագծերի փաթեթում առանձնահատուկ մտահոգիչ էի համարել «Սահմանադրական դատարանի մասին» սահմանադրական օրենքում նախատեսվող հատկապես երկու փոփոխություն:

«Նախ՝ նախագծերի փաթեթում առկա կարգավորման համաձայն՝ Սահմանադրական դատարանի դատավորի նկատմամբ ոչ իր լիազորությունների իրականացման կապակցությամբ քրեական հետապնդում հարուցելու կամ նրան ազատությունից զրկելու դեպքում նրա լիազորությունները կասեցվում էին մինչև քրեական գործով վարույթի ավարտը։ Նախ՝ պետք է նշել, որ ո՛չ Սահմանադրությամբ, ո՛չ էլ «Սահմանադրական դատարանի մասին» սահմանադրական օրենքով նախատեսված չէր ՍԴ դատավորների լիազորությունների կասեցման հնարավորություն: Հետևաբար՝ նախագծի լրամշակված տարբերակում այլևս անդրադարձ չկա ՍԴ դատավորների լիազորությունների կասեցմանը»,- ասաց նա:

Բացի այդ՝ նախագծերի փաթեթում նախատեսվում էր, որ օգոստոսի 1-ից մինչև հոկտեմբերի 31-ը հրաժարական ներկայացրած Սահմանադրական դատարանի դատավորները մինչև իրենց պաշտոնավարման տաիրքը լրանալը պահպանում են իրենց հրաժարականի պահին ունեցած աշխատավարձը, դրա նկատմամբ սահմանված հավելավճարները և սոցիալական երաշխիքները, իսկ պաշտոնավարման տարիքը լրանալուց հետո ստանում են օրենքով նախատեսված կենսաթոշակ:

Բարձրացված քննադատական ալիքի արդյունքում՝ ՀՀ արդարադատության նախարարությունը հայտարարությամբ հանդես եկավ և ներկայացրեց դատավորների վաղ տարիքից կենսաթոշակի անցնելու վերաբերյալ միջազգային փորձ, որն աղերս չուներ իրենց կողմից ներկայացած ՍԴ-ի հետ կապված կարգավորումներին, քանի որ ներկայացված նախագծերի փաթեթի համատեքստում, որն անգամ դեռևս չլինելով ընդունված օրենք՝ ընդամենը եռամսյա ժամկետ էր սահմանվում ՍԴ դատավորների համար այդ հնարավորությունից օգտվելու համար:

Այսինքն՝ այդ համատեքստում արդեն գործ ունեինք ոչ թե սոցիալական երաշխիքի, այլ՝ ՍԴ դատավորներին ուղղված այլընտրանք-շանտաժի հետ»,- ասաց Գ.Մելոյանը: Նախագծերի լրամշակված փաթեթում սահմանել է հետևյալ ձևակերպումը՝ Սահմանադրության 213-րդ հոդվածով նախատեսված՝ մինչև Սահմանադրության 7-րդ գլխի ուժի մեջ մտնելը նշանակված Սահմանադրական դատարանի անդամի կողմից հրաժարական ներկայացվելու դեպքում լիազորությունները դադարելուց հետո մինչև իր համար Սահմանադրությամբ սահմանված պաշտոնավարման տարիքը լրանալը նա ստանում է կենսաթոշակ՝ հրաժարականի պահին ստացած պաշտոնային դրույքաչափի ու հավելավճարի չափով: Հաելյալ սահմանվել է նաև, որ այս կարգավորումը չի տարածվում

«Սահմանադրական դատարանի մասին» սահմանադրական օրենքի ուժի մեջ մտնելուց հետո ընտրված դատավորների վրա: Մեր զրուցակիցը նկատեց, որ դեռևս այլընտրանքային առաջարկի նրբերանգներ կան կարգավորման մեջ, սակայն ողջունելի է, որ այն գոնե ինչ որ չափով մոտեցվել իրավական տրամաբանության սահմաններին:

Աղբյուր` Փաստինֆո