Փաստ ինֆո

Առանձնապես խոշոր չափերի վատնում կազմակերպելու, պաշտոնեական լիազորությունները չարաշահելու մեջ մեղադրվող ՊԵԿ նախկին նախագահ Գագիկ Խաչատրյանը «Աստղիկ» բժշկական կենտրոն է գնացել իր անձնական բժշկի  հետ։ Այս մասին «Փաստինֆո»-ն տեղեկացավ «Աստղիկ» բժշկական կենտրոնից։

«Գագիկ Խաչատրյանը հետազոտման է տեղափոխվել իր անձնական բժշկի, իրեն ուղեկցողների հետ։ Հոսպիտալացված չէ, հետազոտվել է և գնացել»,-ասաց «Աստղիկ» ԲԿ-ի աշխատակիցը՝ նշելով, որ չի տիրապետում հավելյալ տեղեկատվության։

Ավելի վաղ Քրեակատարողական վարչության հանրային կապերի բաժնի պետ Նոնա Նավիկյանից տեղեկացել էինք, որ Գագիկ Խաչատրյանն այսօր տեղափոխվել է «Աստղիկ» բժշկական կենտրոն։

«Գագիկ Խաչատրյանն այսօր տեղափոխվել է «Աստղիկ» բժշկական կենտրոն՝ հետազոտման»,-ասաց Նոնա Նավիկյանը։

Հիշեցնենք, որ Գագիկ Խաչատրյանը ձերբակալվել է օգոստոսի 27-ին, հետագայում նրան մեղադրանք առաջադրվեց պաշտոնեական լիազորությունները չարաշահելու եւ առանձնապես խոշոր չափերի գույքի վատնում կատարելու համար եւ միջնորդություն ներկայացվել՝ նրա նկատմամբ որպես խափանման միջոց կալանավորումն ընտրելու վերաբերյալ, ինչը բավարարվել է։

Ապա հայտնի դարձավ, որ նրա վերաբերյալ քրեական գործ քննվում է նաեւ ՀՔԾ-ում, որի շրջանակներում արդեն 6 ամիս է, ինչ Գ.Խաչատրյանն ունի մեղադրյալի կարգավիճակ՝ մեղադրվելով 38-179-րդ հոդվածի 3-րդ մասի 1-ին կետով, այն է՝ առանձնապես խոշոր չափերի վատնում կազմակերպելը, սակայն այս գործով ամիսներ առաջ նրա նկատմամբ որպես խափանման միջոց էր ընտրվել ստորագրություն՝ չհեռանալու մասին։
Նշված քրեական գործը ՀՔԾ-ն ուղարկել է ԱԱԾ, որտեղ երկու գործերը միացվել են մեկ վարույթում։

Աղբյուր` Փաստինֆո