Փաստ ինֆո

«Մեկ անգամ չէ, որ մենք լսել ենք ադրբեջանական կողմի անհեթեթ հայտարարությունների մասին, թե Երեւանը մեր քաղաքն է, Սեւանում ոտքեր ենք լվանալու եւ այլն, եւ այլն։ Որքանո՞վ են դրանք նպաստել բանակցային գործընթացին»,- «Փաստինֆո»-ի հետ զրույցում անդրադառնալով ՌԴ ԱԳՆ խոսնակ Մարիա Զախարովայի հայտարարությանը, ասել է մարդկային զարգացման կենտրոնի ղեկավար Թեւան Պողոսյանը ։

Հիշեցնենք, Մարիա Զախարովան արձագանքել է վարչապետ Փաշինյանի՝ Ստեփանակերտում արած «Արցախը Հայաստանն է, եւ վերջ» հայտարարությանը։

Թեւան Պողոսյանի, խոսքով, ՌԴ ԱԳՆ խոսնակը միշտ նույն մեկնաբանությունն է արել, իսկ տվյալ դեպքում Զախարովան դիվանագիտորեն սլաքները ուղղել է եւ հայկական, եւ ադրբեջանական կողմի վրա։

«Հաշվի ենք առնում, ինչ խոսք, որ կան ներքաղաքական հռետորաբանություն, ներքաղաքական գործընթացներ, որոնցով պայմանավորվում են քաղաքական ուժերի, կուսակցությունների կարծիքները՝ նկատի ունենալով, որ մենք խոսում ենք ժողովրդավարական երկրի մասին։ Այնուամենայնիվ, շատ կցանկանայինք, որպեսզի բոլոր կողմերի հայտարարությունները համապատասխանեն խաղաղ կարգավորմանն ուղղված ջանքերի համատեքստին»,-ասել էր Զախարովան։

Դիտարկմանը, արդյո՞ք ՀՀ վարչապետի հայտարարությունը միջնորդների շրջանում Հայաստանը ապակառուցողական ընկալելու վտանգ չի առաջացնում՝ դատելով ՌԴ ԱԳՆ խոսնակի արձագանքից, Թեւան Պողոսյանը նշեց. «Եթե Զախարովայի մեկ նախադասություն վերցնենք, որ այդ տեսակի հայտարարությունները չեն նպաստում բանակցային գործընթացին, այո ընկալվում է , բայց դրա հետ միասին այնտեղ կա մեկ այլ նախադասություն, որի վրա հայկական կողմը պետք է շեշտը դնի։ Նա ասել է, որ մեկ անգամ չեն տարբեր կողմերից հնչել նմանատիպ ապակառուցողական հայտարարություններ, ինչը, մեսիջ էր Ադրբեջանին»։

Թեւան Պողոսյանի խոսքով, այդ հայտարարությունից հետո Փաշինյանը նաեւ ասել է, որ կոշտ հայտարարությունները միայն Ադրբեջանի այլընտրանքը չեն. «Մոտ մեկ ամիս առաջ էլ, թե հիշեք, Արծրուն Հովհաննիսյանը եւ Աննա Նաղդալյանը Օրբելի կենտրոնում էին եւ Արծրուն Հովհաննիսյանն ասաց, որ այլեւս պատերազմ սանձելը կամ հարձակողական որեւէ գործողություն անելը միայն Ադրբեջանի մոնոպոլիան չեն, եթե պետք լինի, մենք էլ կանենք»։

Ըստ Պողոսյանի ժամանակակից աշխարհում միայն շահերի մատրիցան է աշխատում , ուստի, մեր դիվանագիտությունը պետք է կառուցել այնպես, որ աշխարհի բոլոր հզորների շահերը համընկնեն հայկական շահերի հետ։

Անդրադառնալով ԼՂ հիմնախնդրի կարգավորման բանակցային գործընթացին, Թեւան Պողոսյանն ասաց, որ հայկական նոր մոտեցումը այն է, որ Հայաստանը չի պատրաստվում Արցախի փոխարեն բանակցել, Արցախը պետք է վերադառնա բանակցային սեղան եւ եթե ցանկանում ենք քննարկել հիմնահարցը, որի մասն է կարգավիճակի հարցը, պետք է Արցախի հետ նստել բանակցությունների, իսկ Հայաստանը պատրաստ է քննարկել անվտանգության ընդհանուր հարցեր։

Թեւան Պողոսյանը չի գտնում, որ վարչապետի հայտարարության եւ Արցախը բանակցային սեղան վերադարձնելու հայտարարությունները հակասում են միմյանց։ «Չմոռանանք , օրվա խորհուրդը՝ համահայկական խաղերը, չմոռանանք, որ հայտարարությունը Վերածննդի հրապարակում արվեց , որտեղ շարժումն է սկսվել... Մնացածը արդեն դիվանագիտության խնդիր է»,-եզրափակեց Պողոսյանը։

Աղբյուր` Փաստինֆո